Саҥа быраабылаҕа олоҕуран, массыына ыытарга үөрэтэр оскуолалар ГИБДД кытары бииргэ сөбүлэҥ түһэрсэн эрэ баран үлэлиир кыахтаналлар. Үөрэтии саҥа бырагырааммалара мэктиэлэниэхтэрэ, үөрэтэр-материальнай баазаҕа ирдэбил, үөрэтэр кылаастар уонна массыыналар туруктара үрдүөҕэ, маны таһынан, хас биирдии массыына ыытарга үөрэтэр оскуола интэрниэт саайтаах буолуоҕа.

“Туоһу суругу атыылыырга, атыынан үлэҕэ анаан арыллыбыт оскуолалар, арааһа ырыынактан туорууллара буолуо. Дьиҥнээхтии үөрэтэргэ уонна тимир көлөнөн эрэллээхтик салайарга быраап биэрэр анал оскуолалар эрэ хаалаллара буолуо”, - диир “ХИБҮ массыына ыытарга үөрэтэр оскуолатын” үөрэҕин мэтэдиичэскэй Киинин салайааччыта Андрей Неустроев.

Оскуола бырагыраамматыгар саҥа диссипилиинэлэр киириэхтэрэ, оттон үөрэтии кэмэ уһаан биэриэ, ол курдук, В категорияны ылар дьон 156 чаас буолбакка, 190 чаас үөрэниэхтэрэ. Урукку саҥаны киллэрииттэн мопеды уонна скутеры ыытыыга быраап биэрэр саҥа М категорияны бэлиэтиэххэ сөп. Бу быраабы 16 саастарыттан ылыахтарын сөп.

Дьокуускайдааҕы массыына ыытарга үөрэтэр оскуолалар билигин урукку бырагыраамманан киирбит дьону үөрэтэ олороллор. Билигин үөрэххэ ылыы кылгас кэм устата тохтотуллан турар.