Кэрэхсэбиллээҕэ, саха эстрадатын "сулустара" кыттыылаах бэртээхэй тэрээһин Аҕам саастаах дьон күннэригэр ананан тэриллэр. Онон бу бырааһынньыкка дьиэ кэргэнинэн кэлэн сынньанан барар буоллулар.

Былырыын бастакы тэрээһин Нуучча театрыгар буолбутугар, саалаҕа ыалдьыттар баппакка, кэнсиэри туран эрэ көрөөччү үгүс этэ. Баҕар, босхо буолан итиччэ элбэх киһи мустубута буолуо диэҕи, быйыл Саха циркэтин дьиэтигэр кэнсиэр төлөбүрдээҕин үрдүнэн, бу тэрээһиҥҥэ сылдьыан баҕалаах киһи элбэҕэ сөхтөрдө. Чаас аҥара иннинэ тиийбитим, киһи киһини билбэт үлүгэрэ. Өссө: "Ордук билиэттээххит дуо?" -- диэн кэлэн ыйыппыттарыгар, сэбиэскэй кэмҥэ саҥа индийскэй киинэни көрөөрү маннык билиэт былдьаһыга буоларын саныы түстүм.

Тэрийээччилэр бэлэмнээбит программалара да киһини астыннарар. Ол курдук, киирии билиэттэринэн сүүйүүлээх бириистэр (сүрүн бириис - "Panasoniс 42" телевизор), хас биирдии көрөөччүгэ бэлэх -- икки ыйга "Саха сирэ" уонна "Якутияҕа" босхо сурутуу.

Кэнсиэри ыытааччы:"Былырыын Нуучча театрыгар баппатахпыт. Ол иһин быйыл циркэҕэ ыытабыт. Олох мастарга көрөөччү толору олороруттан сылыктаатахха, эһиил стадиоҥҥа ыытыыһыбыт быһыылаах", -- диэбитин көрөөччүлэр дохсун ытыс тыаһынан көрүстүлэр. Кырдьык да, циркэ улахан дьиэтэ көрөөччүнэн туолбута, киһи эрэ астынар көстүүтэ!

Эстрада сулустара Ника, Надина Эльпис, Сахамин бииртэн биир тахсан истилэр. Ыытааччы кылгас тохтобулга эҕэрдэ тылы "Якутия" хаһыат кылаабынай редакторыгар Евгений Грибчатовка биэрэр. Евгений Юрьевич кылгастык хаһыат саҥа сүүрээннэрин билиһиннэрэн баран, "Социал-демократ" хаһыат бастакы редакторын ааттаабыт киһиэхэ редакция бэлэҕин туттарарын туһунан эттэ. Араас сектордартан тута: "Ярославскай!" -- диэн хоруйдар иһилиннилэр. "Толору аата кимий?" -- диэн ыйыппытыгар, ортоку эрээттэн биир дьахтар сөптөөх хоруйу биэрэн, редактор бэлэҕин тутта. Кыыл Уолун аатынан үҥкүү ансаамбыла, аан дойдуга тиийэ аатырбыт "Завод" куорат ыччатын үҥкүүтүн бөлөҕө бэйэ-бэйэлэригэр майгыннаспат ис хоһоонноох бытаан уонна түргэн тэтимнээх хамсаныыларын утуу-субуу бииргэ дьүөрэлээн көрөн, бары да улахан дуоһуйууну ыллыбыт. Дэлэҕэ да, "Завод" үҥкүү бөлөҕө сценаттан сүүрэн тахсаатын кытта, "Саха сирэ" хаһыат редактора Чокуур Гаврильев: "Заводу" көрөөт, "собуоттанан" хааллым", -- диэн бэлиэтиэ дуо?

Чокуур Николаевич ааҕааччыларын хаһыат айар үлэһиттэрин ааттыттан эҕэрдэлээн баран, хаһыаты почтанан эрэ буолбакка, "Сахамедиаҕа" бэйэтигэр кэлэн эмиэ суруттарарга ыҥырбытын, үгүс киһи сонургуу истибит буолуохтаах. Оттон хаһыат эрэдээктэрэ:

-- "Манчаары"-"Кыым" хаһыат тэрийээччилэрин редакционнай коллегиятыгар ханнык политик киирбитэй?" -- диэн ыйытаатын кытта, атыттарга толкуйдуур да түгэни биэрбэккэ, саала түгэҕиттэн: "Исидор Барахов" -- диэн хаһыы иһилиннэ. Чокуур Гаврильев ааҕааччытыгар сүүрэн тиийээт, редакция бэлэҕин туттара туран, көрөөччү аатын уонна ыйытык эппиэтин хантан билэрин ыйытта.

-- Юлия диэммин. Исидор Барахов -- биир дойдулааҕабын, -- диэн хоруйтан бу бэриниилээх ааҕыччыбыт эбит диэн киэн тутта санаатыбыт.

... Күүтүүлээх дьэ түгэн үүнэр: көрөөччүлэр ыытааччы туттарын-хаптарын бары эрэнэ кэтэһэллэр: "Panasoniс" миэнэ буолаарай?". Чочумча буолаат, сыаналаах бириис бэйэтин хаһаайынын булар! Киин куорат олохтооҕо телевизор хаһаайына Гаврил Сивцев бу үөрүүлээх күнү умнубата чахчы. Телевизора күн аайы "Саха сирэ" уонна "Якутия" хаһыаттары саната туруо буоллаҕа!

Мин бу бэлиэ тэрээһиҥҥэ кэлбит дьону кытта көрсөн кэпсэттим. Ыйытыым: "Саха сирэ" хаһыаты суруттараҕын дуо? Кэнсиэри хантан истэн кэллиҥ?" -- диэн.

Сэмэн Тэптиргээнэп, Дьокуускай олохтооҕо: "Соторутааҕыта Өлүөхүмэ улууһуттан көһөн кэлбиппит. Оҕо эрдэхпиттэн "Саха сирэ" хаһыаты кытта алтыһан улааппытым. Дьонум суруттараллар. Билигин атыылаһан ааҕабын. Онон хаһыат биллэриититтэн бу тэрээһини билэн кэлбитим".

Наталья ТЮРИНА, Уус-Алдан Тумул нэһилиэгин олохтооҕо: "Саха сирэ" хаһыаты өрүү ааҕабын. Ол эрээри кэлиҥҥи кэмҥэ солом олох суох буолан, суруттарбакка сылдьыбытым. Хата, манна кэлэн суруттардым. Сурутууну манна, циркэҕэ, кэлэн ыыппыттара хайҕаллаах суол, онон "Саха сирэ" хаһыаты дьиэбэр сурутан ааҕар буоллум. Редактор хаһыат саҥа сүүрээннэрин, уларыйыылары кэпсээбитин интэриэһиргээн иһиттим. Онон хаһыаппын тэһийбэккэ кэтэһиэм. Кэнсиэргэ кыыһым "Арка-Арктика" ансаамбыл бөлөҕөр кытынна, кини толоруутун көрөөрү, оҕолорбун кытта кэлбиппит".

Николай СТЕПАНОВ, Дьокуускай олохтооҕо: "Мин инбэлиит буолан Инбэлииттэр куораттааҕы обществоларыттан "Якутияны" уонна "Заботаны" босхо ылан ааҕабын. Дьиҥэр "Саха сирэ" хаһыаты эмиэ холбуу биэрэллэрэ буоллар диэн баҕалаахпын. Хаһыат -- олоҕум суолдьута. "Саха сирэ" халыҥ хаһыатын олус сөбүлээн ааҕабын. Бэчээккэ таҕыстар эрэ, көтүппэккэ атыылаһан ааҕабын. Бу кэнсиэргэ хаһыакка тахсыбыт биллэриини ааҕан кэллим. Сөбүлүүр ырыаһытым Анатолий Бурнашеву кыттыа дии санаабытым да, ыллаабата.

Ити курдук "Саха сирэ" уонна "Якутия" хаһыаттар аҕам саастаах дьоҥҥо бэлэхтээбит кэнсиэртэрэ үгэскэ кубулуйан, сылтан сыл аайы киэҥ ис хоһооннонон, далааһыннанан истин диэн алҕаатахпыт буоллун!