ХИФУ педагогическай хайысхаҕа проректора Михаил Федоров туйгун үөрэҕин уонна университет общественнай олоҕор көхтөөх кыттыытын иһин математика уонна информатика Институтун студенткатыгар Маргарита Алексееваҕа Саҥа дьыллааҕы каникулугар Санкт-Петербурга сынньанан кэлэр путевканы туттарда.

Михаил Федоров спектаклы туруорарга кыттыбыттарга барыларыгар махтанна. «Билиҥҥи тэтимнээхтик сайдар үрдүк технология кэмигэр, сороҕор учуутал сырдык аата дьиҥнээх суолтатын сүтэрбит курдук саныыллар. Бу сүүнэ үлэ түмүгэр студент ыччат педагог идэтин атын хараҕынан көрбүтэ буолуо диэн эрэллээхпин», ─ диэтэ.

«Биһиги бу үлэни наһаа дириҥник ылыныахтара дии санаабатахпыт. Ол эрээри спектакль темата көрөөччүлэр сүрэхтэрин, өйдөрүн таарыйбат буолуон сатаммат. Маҥнайгы учуутал, биллэн турар, үөрэнээччилэригэр идеал буолар. Михаил Андреевич Алексеев оннук киһи этэ. Кини учуутал сырдык мөссүөнүн уонна улуу аатын үрдүктүк туппута», ─ диэтэ спектакль кэнниттэн культура уонна духуобунай сайдыы миниистирэ Андрей Борисов.

Премьераҕа Михаил Алексеев чугас аймахтара: уола Михаил Алексеев ─ Республикатааҕы лицей-интернат учуутала, сиэнэ Андрей Алексеев ─ ХИФУ горнай факультетын преподавателэ уонна сиэнэ Маргарита Алексеева ─ федеральнай кыһа математикаҕа уонна информатикаҕа Институтун студентката сырыттылар.