Хомуурунньукка Саха Республикатын култууратын үтүөлээх үлэһитэ, Мэҥэ Хаҥалас улууһун бочуоттаах олохтооҕо, самодеятельнай композитор Марфа Данилова – Хатыҥ Ай 160 ырыата уонна кини ырыатын толорбут эстрада ырыаһыттара, профессионал артыыстар, оҕотуттан кырдьаҕастарыгар тиийэ ыллаабыт ырыаһыттар, ансаамбыллар хаартыскалара киирдилэр. Үөрүүлээх тэрээһиҥҥэ кыттыыны ыллылар СР народнай артистката Ф.А.Баишева, “Көмүөл” издательство главнай редактора Б.И.Павлов, норуот маастара А.Н.Зверева, “Чүүйэ” нэһилиэгин баһылыга А.К.Васильев уо.д.а.

Марфа Тихоновна ырыаларын: “Иһит, олоҥхо дойдутун оҕото” Раиса Захарова, “Саха дэтэр аналым” Варя Аманатова, “Тыгын Дархан” Александр Дьячковскай – Саарын аргыс оҥостон, ыллыы-туойа сылдьыбыттара уонна сылдьаллар.

Саҥа үйэҕэ аныгы кэм, ийэ, таптал, тымныы хотугу кыраай, саха талааннаахтарын, сэрии геройдарын, олоҥхо дойдутун туһунан кылыһахтаах ырыалары мустубут дьоҥҥо СР үтүөлээх артистката Софья Баранова, “ Далбар” народнай ансамбль уонна ветераннар хордара бэлэхтээтилэр. Кэрэ мелодиялары – матыыптары ыллыы – айа сырыт диэн алгыы хаалабыт.