«Поваренок» куруһуокка үөрэнии кэмигэр оҕолор алта практическай дьарыгы барыахтара.

Кинилэргэ остуол прибордара уонна иһит хайдах туттулларын, сандалыны тардыы үгэстэрин, салааты оҥоруу, үллүбэтэх тиэстэттэн астары, сылаас бүлүүдэлэри буһарыы, уонна киэргэтии туһунан кэпсиэхтэрэ, үөрэтиэхтэрэ. Дьарыктар түмүктэринэн үөрэнээччилэр зачетнай соруктары толоруохтара. Курсу бүтэрии кэнниттэн хас биирдии асчыт оҕо туоһу сурук тутуоҕа.

Тэрийээччилэр оҕолорго ылбыт билиилэрэ кэнники туһалыахтара диэн эрэллээхтэр. Курсу ааспыт үөрэнээччилэр дьиэлэригэр чугас дьоннорун бэйэлэрэ астаабыт минньигэр бүлүүдэлэринэн үөрдүөхтэрэ, ону таһынан, кэнники кинилэртэн ким эрэ асчыт идэтин ылыан баҕарыа.

Ону таһынан, Саҥа Дьыл саҕана интэриэһинэй уонна минньигэс астары бэлэмнээһиҥҥэ аналлаах бырааһынньыктааҕы маастар-кылаастар күүтүллэллэр.