- Дьокуускай былыргыттан билиҥҥэ диэри элбэх омуктар олорор куораттара буолар – Хотугу сиргэ итинтэн атыннык олорор сатаммат, биһиги кытаанах усулуобуйабытыгар бэйэ-бэйэни өйөһүүтэ уонна көмөлөһүүтэ суох сатаан олорбоккун. «Ынырыктаах саха национализмын» туһунан дьоһуннаахтык ырытар дьон Москваттан ыраата иликтэрэ көстөр.

Биһиги 400 сыл кэриҥэ кэм устата Россия сорҕото буолабыт, биһиги нууччалары кытта кэккэлэһэ эрэ буолбакка, бииргэ олоробут. Манна олорор киһи сахалар уонна маннааҕы олохтоох нууччалары кытта ханнык да утарсыылар суохтарын көрө сылдьар. Биһиги тугу да былдьаһарбыт суох – бары Саха сирин олохтоохторобут. Уонна сахалар-нууччалар эрэ буолбакка, элбэх атын омук бэрэстэбиитэллэрэ эмиэ.

Дойду ханнык баҕарар куораттарыгар буоларын курдук, Дьокуускайга эмиэ олохтоох нэһилиэнньэ – уруккуттан манна олорор нууччалар да, сахалар да, атын да омуктар, оттон олор 120-лэр! – миграннар кэлиилэрин сөбүлээбэттэр. Ити, туох-ханнык иннинэ баар социальнай сөп түбэһии суоҕуттан тутулуктаах.

Оттон нэһилиэнньэ барыыта – Дьокуускайтан Москваҕа, Петербурга, атын да улахан куораттарга көһүү, ити хаһан баҕарар буолар көстүү. Урут дьону манна хотугу хамнас тутара (манна угуйара), билигин буоллаҕына Москваҕа үчүгэй специалист Дьокуускайдааҕар быдан элбэх хамнастаах, күнүн-дьылын туруга сымнаҕас, олох хаачыстыбата үрдүк. Күммүт-дьылбыт туругун уларытар кыахпыт суох, онон дойдубутуттан ханна да барбат туһугар Дьокуускайбытын дьиҥнээхтик олорорго табыгастаах гына оҥоруоҕуҥ.