РФ ИДьМ-тын СӨ ИДьМ-тын лицензияны биэрэр, көҥүллүүр киинин начальнига, полиция полковнига Владимир Соловьев "Саха сирэ" хаһыакка иһитиннэрбитинэн, бу сыл 10 ыйыгар сэп-сэбиргэл туттуулаах 84 буруй оҥоһуллубут (былырыын – 87 буруй). Олортон 21-рэ – киһини соруйан өлөрүү, 7-тэ – киһиэхэ ыарахан эмсэҕэлээһини оҥоруу, 11-рэ – күлүгээннээһин уо.д.а. Үс улууска – Хаҥаласка (2-тэн 7-ҕэ диэри), Томпоҕо (бииртэн 8-ка диэри) уонна Чурапчыга (бииртэн 5-кэ диэри) – буруй бу көрүҥэ элбээбит.

Маныаха ити 84 түбэлтэттэн аҥарыгар көҥүлэ суох саанан, аҥарыгар көҥүллээх саанан буруйу оҥорбуттар. 18 түбэлтэҕэ – саалаах киһи бэйэтэ буруйу оҥорбут. Сэрэйиллибитин курдук, бу буруйдар 80 %-нара итирик сылдьан оҥоһуллубуттар.

Өрөспүүбүлүкэ үрдүнэн төһө киһи саалаах-саадахтаах эбитий? 103.941 киһи. Саа ахсаана – 142 тыһыынчаттан тахса. Итинтэн буулдьанан ытар саа – 20.460, гладкоствольнай саа – 112.403, бэйэни көмүскэнии сэбэ-сэбиргэлэ – 7.487 («травмат»), комбинированнай саа – 1.614. Маны таһынан, 3.423 сулууспаҕа туттуллар сэп-сэбиргэл баар.

Биллэрин курдук, полиция үлэһиттэрэ саалаах дьону тиһигин быспакка бэрэбиэркэлииллэр. Ол курдук, бу дьыл 9 ыйыгар 77 тыһыынчаттан тахса бэрэбиэркэ ыытыллыбытын түмүгэр, 6.176 саа (ол иһигэр, 365 көҥүлэ суох саа) былдьаммыт. Буруйу оҥорон уонна сааны харайыы, илдьэ сылдьыы ирдэбиллэрин кэһэн, 447 лицензия уонна көҥүл былдьаммыт. Административнай сокуону кэспит киһи саата биир сылга былдьанар.