Куонкурус тыа сирин олохтоохторо спордунан дьарыктаналларыгар, доруобай, чөл туруктаах буолалларыгар уонна уопуттарын тарҕаталларыгар анаан тэриллибитэ. Кыайбыт нэһилиэккэ эһиил сайын  4,5 мөлүйүөн суумалаах анал эрэһиинэ бүрүөһүннээх, бары ирдэбилгэ эппиэттиир аныгы спортивнай былаһаакка тутуллуо. 

Саха сиригэр спордунан утумнаахтык дьарыктанар элбэх нэһилиэк баар. Кинилэр тыҥааһыннаах киирсиилэрин түмүгүнэн Таатта улууһун Тыараһа нэһилиэгэ кыайыылааҕынан ааттанна. 

«Тыараһа урут-уруккуттан спортивнай нэһилиэгинэн биллэр. Ол курдук, Тааттаҕа «волейбол» диэтэххэ, бары «Тыараһа, Кыйы» диэн саныы түһэллэр. Кырдьаҕастыын, эдэрдиин спордунан утумнаахтык дьарыктаналлар. Биһиэхэ волейбол, саахымат, дуобат, остуол тенниһэ, атах оонньуулара ордук сайдыбыт. Биир Россия спордун маастара, алта өрөспүүбүлүкэ спордун маастара бааллар. Саҥа көрүҥ – буулдьанан ытыы  сайдан эрэр. Бу көрүҥҥэ спорт маастара Екатерина Сунхалырова өрөспүүбүлүкэҕэ номнуо биллэр-көстөр ситиһиилэрдээх.

Былырыын улуус нэһилиэктэригэр ыытыллыбыт спартакиадаҕа иккис миэстэни ылан, 80 тыһ. солк. бириэмийэлэммиппит. Бу харчынан сайын куораттан оператор тахсан ролик устубута. Онон кыайаммыт, үөрүүбүт муҥура суох. Төлөпүөнүнэн, «ватсабынан» эҕэрдэлэр кэлэ тураллар. 

Спортивнай былаһаакка тутуллуута, биллэн турар, нэһилиэк олоҕор улахан суолталаах. Бастатан туран, оҕолорбут, ыччаппыт сайын устата атыҥҥа аралдьыйбакка дьарыктаналларыгар, доруобуйалара тупсарыгар уонна спорка көрдөрүү үрдүүрүгэр оруоллаах буолуо», – диэн нэһилиэк баһылыга Святослав Сунхалыров үөрүүтүн үллэстэр. 

Тыараһа нэһилиэгэ өссө чөл олохтоох нэһилиэк быһыытынан биллэр. Биир маҕаһыыннаахтара оскуолаттан чугас турар буолан, арыгы атыыта бобуллубута. Онон атын нэһилиэктэргэ холобур буолар кыахтаах.