Улахан Күөл учаастагар бу күннэргэ уон биэс ыал оһох кулута буолар кыһалҕаттан босхолонно. «Сылаҥ нэһилиэгэ» муниципальнай тэриллии баһылыга Егор Сивцев эппитинэн, бу сайыҥҥаттан олорор дьиэлэри ититэр тиһиккэ холбооһуҥҥа үлэни саҕалаабыттар. Урут хочуолунайдара эргэ, кыамтата кыра буолан үгүс кыһалҕаны көрсөллөр эбит. Онон көрүллүбүт үбү-харчыны саҥа модульнай хочуолунайы туруорууга туһаайбыттар уонна Олорор дьиэ-уот, коммунальнай хаһаайыстыбатын министерствотын кытта кэпсэтэн ититэр тиһиги тардыбыттар.

«Эрдэ түөрт олорор дьиэ хочуолунайтан сылытыллан олорбута. Күн бүгүн онно эбии сэлиэнньэбит соҕотох уулуссатын уон биэс ыала бары кииннэммит ититэр тиһиккэ холбонно. Ол эрээри бу хайысхаҕа үлэ-хамнас хойутаан, хаар түспүтүн кэннэ саҕаламмыта, онон аны сайын дьиэлэри барыларын ититэр тиһиккэ холбуохпут», - диэтэ Егор Афанасьевич.

Үөһэ ахтыллыбыт тэрээһиҥҥэ архитектура, тутуу комплексын министрэ Вера Кузакова Улахан Күөлгэ бары ирдэбилгэ эппиэттиир модульнай хочуолунай тутуллубутунан, ититэр тиһик тардыллыбытынан, 50 үөрэнээччигэ, 15 оҕо саадын иитиллээччитигэр анаммыт саҥа уһуйаан тутуута 2016 сылга түмүктэниэҕин иһитиннэрбитэ.

Онон Улахан Күөл учаастага иккис тыынын ылан, сарсыҥҥы күнү эрэллээхтик көрсөр.