Чурапчы Мугудайыгар ыытыллыбыт “Куйуур-2015” күрэскэ биэс улуус хамаандата куоталаста

Ааспыт нэдиэлэҕэ Мугудай нэһилиэгэр доруобуйаларынан хааччахтаах дьоммутугар «Куйуур-2015» республикатааҕы күрэхтэһии үһүс төгүлүн ыытылынна. Мустубут дьону, спортсменнары, тэрийээччилэри Мугудай нэһилиэгин дьаһалтата сахалыы сиэринэн алаадьылаах саламаатынан айах тутан көрүстэ.

Улуу Кыайыы 70 сылыгар анаммыт быйылгы күрэхтэһиигэ элбэх хамаанда кытынна. Ол курдук, Намтан, Уус-Алдантан, Тааттаттан, Мэҥэ-Хаҥаластан уонна бэйэбит нэһилиэктэрбититтэн - Мындаҕаайыттан, Мугудайтан, Дириҥтэн барыта аҕыс хамаанда куоталаста.

Хамаандалар куйуурга, саанан сыал ытыытыгар, „Көрдөөх эстафетаҕа” күрэстэстилэр. Куйуур күрэҕэ Мугудай нэһилиэгин Хабыйахаанннаах күөлүгэр ыытылынна. Манна бастакынан уонна саамай элбэх балыгы туппут Мэҥэ-Хаҥалас хамаандата бастаата. Иккис миэстэни Таатта улууһун куйуурдьуттара ыллылар, үһүскэ Мындаҕаайы нэһилиэгин хамаандата таҕыста.

Салгыы Мугудай биир улахан күөлүгэр бэлэмнэммит суолларга тахсан буулдьанан ытыыга күрэхтэстилэр. Түмүккэ Мугудай нэһилиэгин хамаандата 129 очукуону ылан бастакы миэстэни хааччынна. Нам хамаандата 58 очукуолаах иккис буолла, кинилэртэн биир очукуонан хаалбыт мэҥэ-хаҥаластар үһүс миэстэни ыллылар. Бу көрүҥҥэ дьахталларга, эр дьоҥҥо «Бэргэн ытааччы» ааты Мугудай хамаандатыттан И.С. Толстоухов уонна М.Г. Григорьева ылан анал бирииһинэн бэлиэтэннилэр.

Саамай эрийсиилээх, мөккүөрдээх күрэхтэһиинэн „Көрдөөх эстафета“ буолла. Тоҥуу хаарга сүүрэртэн саҕалаан, салааскаҕа киһини олордон сүүрүү, онтон иккиэ буолан ойбону алларан, биэдэрэҕэ толору уу баһан илдьэн, мас эрбээн, уот оттон, ким чэйэ эрдэ оргуйбутунан түмүк таҕыста. Мугудайдар чэйдэрэ ким-хайа иннинэ оргуйан кыайыылааҕынан ааттаннылар. Чурапчы сүүмэрдэммит хамаандатын чэйэ иккиһинэн оргуйан,иккис миэстэҕэ тиксэн, санаалара бөҕөргөөтө. Мэҥэ-Хаҥалас улууһа манна да си-дьүгээр буолбата - үһүс бириистээх миэстэни ылла.

Үс көрүҥ түмүгүнэн бастаабыт Мэҥэ-Хаҥалас хамаандата кыһыл көмүс мэтээлинэн, көһө сылдьар кубогынан, дипломунан, салгын саатынан наҕараадаланна. Иккис миэстэни дойдулаахтар - Мугудай нэһилиэгин хамаандата ылан,үрүҥ көмүс мэтээлинэн, дипломунан, салгын саатынан биһирэннэ. Үһүс бочуоттаах миэстэтин Чурапчы сүүмэрдэммит хамаандата ылла уонна боруонса мэтээлинэн, дипломунан, саанан наҕараадаланна.

«Куйуур- 2015» саамай саастаах күрэстэһээччитин аатын Чурапчы нэһилиэгин олохтооҕо М.А. Владимирова, саамай эдэр кыттааччы аатын Дириҥ хамаандатын чилиэнэ А.Г. Собакин ыллылар.