Чурапчыга ыытыллыбыт «Музыкальнай ринг» көрөөччүлэр биһирэбиллэрин ылла

Бырайыак ааптарынан „Айылгы“ Култуура уонна духуобунай сайдыы киинин режиссера Иван Бушков, салайааччытынан култуура управлениетын уус-уран салайааччыта Анна Пинигина буолаллар. Манна көрөөччү анал жетонун сөбүлээбит толорооччутугар биэрэн куоластаата. Дьүүллүүр сэбиэт председателинэн „Утум“ студия салайааччыта Георгий Сергучев үлэлээтэ.
„Айыллаан“ Сынньалаҥ киинин дириэктэрэ, улуус бастыҥ эдэр шоумена Петр Гуляев күрэһи олус сатабыллаахтык иилээн-саҕалаан ыытта. Сцена уотун-күөһүн, киэргэтиитин , видеороликтары туһаныыны техническэй режиссер Гаврил Лыткин хамаандата кыайа-хото тутта.
Бастакы түһүмэххэ саха эстрадатын ырыаһыттара Андреана, Майя Сергина, Сахамин, Александр Ущницкай, Сергей Сорокин сүргэни көтөҕөр ырыаларын бэлэхтээтилэр. Иккис түһүмэххэ эстрада ырыаһыттарын кытта дуэтынан Сергей Сорокин-Семен Ноговицын, Татьяна Андросова-Андреана- Валерий Корякин, Сардаана Кузьмина-Александр Ущницкай, Майя Сергина-Оксана Жиркова, Любовь Монгуш –Сахамин бииртэн биир киһи дууһатын кылын таарыйар, уйулҕатын уһугуннарар, нарын-намчы ырыалары толордулар. Олохтоох ырыаһыттар бэйэлэрин репертуардарыттан ыллаатылар. Семен Ноговицын, Сардаана Кузьмина, Оксана Жиркова, Любовь Монгуш, Валерий Корякин истиҥ иэйиилээх ырыаларын дьонноругар-сэргэлэригэр бэлэхтээтилэр.

Сахамин, саха эстрадатын ырыаһыта: «Чурапчы улууһун «Айылгы» киинэ тэрийбит бырайыагар ыҥырыллан кэллибит. Любовь Монгуштуун кыттабыт. Дуэтынан ыллыырга үөрүйэхпин - кэргэмминээн Розалина Файрушиналыын элбэхтэ кэнсиэргэ бииргэ ыллыыбыт. Кыттааччылар бары күүстээх куоластаахтар. Бу бырайыак таһыма үрдээн истин, сайыннын».
Татьяна Андросова-Андреана: «Ааһан эрэр сыл тус бэйэбэр элбэх ситиһиини аҕалла. Дьокуускай куоракка ыытыллыбыт «Две звезды», «Саҥа ырыа», Чурапчыга «Үүт -үкчү» бырайыактар кыайыылаахтарынан буолбуппунан олус үөрэбин».
Александр Ушницкай, «Туймаада» вокальнай ансаамбыл солиһа: «Бу күһүн «Айылгы» киин үлэһиттэрэ бырайыакка кыттарбар тыл көтөхпүттэрэ. Чурапчы олохтоохторо, көрөөччүлэр истиҥник көрсүбүттэригэр, өйөөбүттэригэр махтанабын. Бырайыак олус табылынна дии саныыбын.Тэрийээччилэр ымпыгар-чымпыгар бэлэмнэммиттэрэ көстөр, саҥаттан саҥа идеялара олоххо киирдиннэр».
Сардаана Кузьмина, Чурапчы: «Наһаа үчүгэй бырайыагы тэрийдилэр. Бэйэм оҕо эрдэхпиттэн ыллыыбын. Дьонум-сэргэм өйөбүллэригэр махтанабын».
Анна Пинигина, бырайыак салайааччыта: «Бу режиссер И.И.Бушков идеята. Коллективпыт түмсүүлээх, хамаанда үлэтэ күүстээх буолан бу улахан бырайыагы республикаҕа бастакынан ыыттыбыт. Мантан сиэттэрэн ырыаһыт өссө үлэлииргэ, сайдарга дьулуһара эрэбил».
Лена Ноговицына, Зинаида Теренкова, көрөөччүлэр: « Биһиги анаан-минээн Хадаар нэһилиэгиттэн киирэн, бу ырыа бырааһынньыгар сылдьан астынныбыт. Өссө да саҥа ырыаларынан көрөөччүлэри үөрдэ турдунар. Сылдьыбыт эрэ дьон тэрээһин таһыма үрдүгүн бэлиэтииллэр».
Көрөөччүлэр баһыйар үгүс куоластарын ылан «Музыкальнай ринг» күрэс кыайыылаахтарынан эстрада ырыаһыта, биир дойдулаахпыт Татьяна Андросова-Андреана уонна Хоптоҕо нэһилиэгин күүстээх куоластаах ырыаһыта Валерий Корякин буоллулар, 100 тыһ. солк. сертификатынан биһирэннилэр. Бары кыттааччыларга диплом уонна 10 тыһ. солк. сертификат туттарылынна.