Сарсыардаттан Анастасия, Василий Поповтар ыҥырыылаах ыалдьыттары - „Чурапчы улууһа (оройуона)“ баһылыгын А.Т.Ноговицыны, СР Правительствотын тыа хаһаайыстыбатыгар департаменын салайааччытын А.В.Афанасьеваны, СР тыа хаһаайыстыбатын министрин солбуйааччытын Н.С.Афанасьевы, улуус тэрилтэлэрин салайааччыларын, Мугудай нэһилиэгин баһылыгын К.И.Пермякову уонна да атыттары алгыһынан көрүстүлэр.

Тэрээһин үөрүүлээх чааһа спортивнай саалаҕа ыытылынна. Нэһилиэк баһылыга К.И.Пермяков эҕэрдэ тылыгар 1957 сыллаахха Мугудайга бастакы механизированнай хотону, типовой дьиэлэри туттарбыт И.И.Сивцевы аҕынна, 2015 сылга Иван Ильич төрөөбүтэ 100 сыла буоларын бэлиэтээн ыйда. Манна даҕатан эттэххэ, „Чараҥ“ агрокластер эмиэ тыа сиригэр бастакы саҕалааһын, үтүө бачыым буолар. Кузьма Иннокентьевич республикабыт правительствотыгар, Тыа хаһаайстыбатын министиэристибэтигэр, улуус дьаһалтатыгар өйөбүллэрин иһин махталын биллэрдэ. „Чурапчы улууһа (оройуона)“ МТ баһылыга А.Т.Ноговицын: „Бу агрокластербыт саҥа хамсааһын быһыытынан улууспутугар тыа хаһаайыстыбатын өрө көтөҕүүгэ төһүү күүс, республикаҕа бастыҥ уопут буолуо диэн эрэнэбин. Бу эйгэҕэ көлүөнэ солбуйсуута буолан эрэриттэн астынабын. Онон агрокластер кыттыылаахтарыгар, кинилэр төрөппүттэригэр, олохтоохторго, өйөөбүт бары дьоммутугар-сэргэбитигэр махтанабын“,—диэтэ.

Дьоро күн ырыанан-тойугунан доҕуһуолланна. Үрүҥ илгэни үрүлүтэр, хороҕор муостааҕы үксэтэр саҥа хамсааһыны олохтоохтор уруйдаатылар-айхаллаатылар, сыраны ирдиир сындалҕаннаах үлэҕэ эдэрдии эрчими, ситиһиилэри баҕардылар.