Эмтиир уонна чэбдигирдэр кыаҕа кэҥиир, олору «Бэс Чагда» билигин бэйэтин сынньанааччыларыгар эрэ буолбакка, бары баҕалаах москвичтарга оҥорор. Рублёвкаҕа баар Саха сирин чэбдигирдэр киинэ бэйэтин республикатын баай культуратын көхтөөхтүк пропагандалыырын таһынан, онно саха медицинатын программаларын киллэрэр, ол иһигэр «тыыннаах утаҕынан» -кымыһынан, таба муоһунан уонна да атыттарынан эмтиир. Санаторий иннигэр турар соруктар уонна олору быһаарыы туһунан биһиэхэ генеральнай директор Геннадий Полушкин кэпсээтэ:

– Саха сирин дьоно биһиги санаторийбыт эмтиир-сэрэтэр уопсай хайысхалаах тэрилтэ буоларын билэллэр. «Бэс Чагдаҕа» эмтиир үлэлэр санаторнай-курортнай кээмэйинэн ыытыллаллар: сүрэх-тымыр систиэмэтин, тирэнэр-хаамар аппараты, ньиэрбэни, тыынар, ас буһарар органнары эмтиибит. Биһиги аныгы оборудованиелаахпыт. Кабинеттар олох саҥа бастыҥ аан дойду оҥорон таһаарааччыларын тэриллэринэн толорулар. Санаторийга үрдүк таһымнаах специалистар үлэлииллэр, олор истэригэр элбэх медицинскэй наука кандидаттара, үрдүк категориялаах быраастар бааллар.

Билигин путевка отут бырыһыанын кэриҥэ госсакааһынан барар уонна Саха сирин бюджетынан төлөнөр. Ол эрээри биһиги санаторийбытыгар москвичтар, куорат ыалдьыттара эмиэ сынньаналлар.

Биһиги эмтиир-чэбдигирдэр үлэбитигэр саха медицинскэй көрүҥнэрин туһанабыт. Ол курдук, кымыһынан эмтээһин биһиги эмтиир программабытыгар киирбитэ ыраатта. Сотору кэминэн биһиги ыалдьыттарбытыгар олох саҥа процедураны киллэрдибит: таба муоһуттан биолого-активнай ваннаҕа сытыарабыт, маннык ванна эт-хаан уонна өй-санаа өттүнэн сылайыыны аһарар эрэ буолбакка, уопсай чэбдигирдиигэ көмөлөһөр.

«Бэс Чагда» Саха республикатын үгэстэрин уонна культуратын киэҥник тарҕатар. Холобур, биһиги кэмиттэн-кэмигэр саха астарын күннэрэ ыытыллаллар. Манна элбэхтик саха суруйааччылара, поэттара, артыыстара сылдьаллар. Кинилэр сынньанааччылар иннилэригэр тыл этээччилэр. Библиотекаҕа сахалыы хаһыаттар, кинигэлэр бааллар. Сотору быыстапкалыыр саала аһыахпыт, онно художниктар, фотографтар, скульптордар, ойуулуур-дьүһүннүүр искусство маастардарын үлэлэрэ туруоруллуохтара.

Өссө биир суолталаах пуунунан санаторий кэлим сайдыытын соруктарын көрөбүт. Биһиги бырайыакпытын республика Правительствота өйөөтө, онон санаторий иккис уочаратын тутуу саҕаланыаҕа.