Ол курдук, соторутааҕыта Үөдэйгэ үс нэһилиэк ыччата кыттыылаах волейбол күрэҕэ буолан ааспыт. Үөдэй ыччата тэрээһиҥҥэ бэйэлэрэ көҕүлээн кафе үлэлэтэр эбиттэр. Оксана хас биирдии ыччакка ким тугу астаан аҕаларын үллэрэр уонна ол астарын атыылаан тэрээһиннэрин бирииһин уйунар эбиттэр. Этэргэ дылы, маннык көхтөөхтүк бэйэ баҕатынан кафе тэрийэн күрэхтэһиини ыытар нэһилиэк туһунан элбэх командировкаҕа сылдьыбытым тухары бастакыбын иһиттим.

Нэһилиэк ыччатын үлэтин-хамнаһын Оксана Петрова маннык билиһиннэрдэ: "Биһиги нэһилиэкпитигэр отуттан тахса ыччат баар. Спорт өттүгэр олус көхтөөхпүт. Мин бэйэм идэбинэн физкультура учууталабын. Бастаан үөрэхпин бүтэрэн кэлиибэр манна идэбинэн үлэлээбитим. Онтон үлэм миэстэтэ суох буолтун кэннэ ыччат лидеринэн анаммытым. Номнуо үһүс сылбын үлэлии олоробун. Хомойорум диэн ыччат хоһо диэн суох. Онон нэһилиэкпит дьаһалтатыгар эбэтэр кулуупка мустабыт. Бэйэм кэргэннээхпин, үс оҕолоохпут. Хамнаһым туһунан эттэххэ, олус кыра – 3 тыһыынча солк. тэҥнэһэр.
Биһиги, Хаҥалас ыччатын лидердэрэ, бэйэ-бэйэбитин кытта сибээһи тутабыт, бэл “WhatsApp” бөлөхтөөхпүт. Онон улууспутугар буолар тэрээһиннэри истэ-билэ олоробут. Суолбут суох буолан почта сырыыта бытаан. Сыл ахсын Саҥа дьыллааҕы тэрээһини ыччаттар тэрийэбит. Нэһилиэкпит тэрээһиҥҥэ көхтөөх. Билигин номнуо тэрээһиммитигэр бэлэмнэнэ сылдьабыт", - диир.

Баһылык үрдэтиэх буолла

Түмүккэ, биһиги Оксана курдук сэргэх, көхтөөх киһини кытта кэпсэтэн бэйэм сүргэм көтөҕүлүннэ. Ол эрээри, уруккуттан туруорсар туруорсуубут биһиэхэ ыччат лидерин хамнастааһын этэ. Билигин даҕаны бу санаабыттан туораабакка этэбин, тоҕо ыччат лидерэ бачча кыра хамнастааҕый? Бу кимтэн тутулуктааҕый? Биһиги ааспыкка Үөдэйгэ сылдьыыбытыгар баһылык суох этэ, нэһилиэк наадаларынан куоракка сылдьар диэбиттэрэ.

Ол иһин Дьокуускайга кэлэн баран Үөдэй нэһилиэгин баһылыгар Прокопий Латышевка төлөпүөнүнэн сибээскэ таҕыстым, онуоха кини маннык хоруйдаата: "Оксана биһиэхэ дуогабарынан үлэлиир. Биллэн турар, үс тыһыынча хамнас кыра. Биһиги нэһилиэккэ спорка диэн 50 тыһыынча көрүллэр, онно эбии улуус 50 тыһыынчаны биэрэр. Туох баар тэрээһиннэрбит бириистэригэр, айанын төлөбүрүгэр, бензиҥҥэ уонна лидербит хамнаһыгар мантан барар. Ыччат лидеригэр дьаһалтабытыгар биир эмит хоһу булан биэриэхпит, ол эрээри кини онно олорон үлэлиирэ саарбах, тоҕо диэтэр үлэтин таһынан маҕаһыыҥҥа атыыһыттыыр. Үс оҕолоох, икки сиринэн үлэлиир эдэр ийэҕэ уустук. Ол да буоллар, хамнас туһунан эттэххэ, Оксана өссө үчүгэйдик бэйэтин үлэлээн көрдөрдөҕүнэ үрдэтиэхпит", - диэтэ.

Былырыын Горнай улууһун ыччатын лидерэ биэс тыһыынча хамнастааҕын туһунан суруйбуппут. Биэс тыһыынчаҕа ким үлэлиэй, урукку лидербит маҕаһыын арынан үлэтиттэн уурайбыт этэ. Хата, быйыл бара сылдьан истибиппит, Бэс Күөлүн ыччатын лидерин хамнаһа быдан үрдээбит этэ. Үрдээбит хамнаска тута саҥа  уол үлэлии сылдьара. Тыа сиригэр ыччат үлэлиир усулуобуйалаах, үгүөрү хамнастаах буоллаҕына олохсуйарын бары бэркэ билэбит. Хомойуох иһин, сорох улуустарга маннык штат төрүт даҕаны суох. Инники кэскилин саныыр баһылык ыччат лидерин туспа хамнастаан, үлэлиир кабинеттаан тэрийэр кыахтаах дии саныыбын.