Соторутааҕыта манна 21 квартиралаах дьиэ үлэҕэ киирдэ. Тутууну “Стройкон» уонна Дьокуускайтан «МОНО-строй» ХЭУо ыыппыттар. 17 биирдии хостоох, түөрт иккилии хостоох киэҥ-куоҥ, тупсаҕай оҥоһуулаах дьиэлэммит дьон үөрүүлэрэ улахан.

Тупсаҕай көстүүлээх сабыс-саҥа дьиэ күлүүһүн туттарар үөрүүлээх түгэҥҥэ «Өймөкөөн улууһа” МО баһылыга Михаил Захаров, улуус сэбиэтин бэрэссэдээтэлэ Татьяны Алферова, «Уус-Ньара бөһүөлэгэ» МТ баһылыга Галины Беляева уонна дьиэ тутуутугар үлэлэспит дьон саҥа дьиэ хаһаайыттарын эҕэрдэлээтилэр.

СИА корреспонденыгар бөһүөлэк дьаһалтатын баһылыга Галина Беляева бу курдуккэпсээтэ: «Биһиэхэ дьиэлэрбит үксүлэрэ 60-70 сыллардааҕы тутуулар. Онон кыһалҕабыт улахан. Оттон бу дьиэ хаарбах дьиэлэртэн көһөрүү программатынан тутуллан, Саҥа дьыл иннинэ аҕай үлэҕэ киирбитэ ураты үөрүүлээх. Ити улууспут киинэ сайдан, тупсан иһэрин, үлэ салҕанарын бэлиэтэ.

Билигин кэлэр сылга тутуу ыытыллыахтаах сирдэрэ номнуо бэлэмнэр. Дьон-сэргэ дьиэтин-уотун тупсарыыны сэргэ, кэлэр өттүгэр өссө оҕолор оонньуур комплекстарын тутары былаанныыбыт. Итинник, саҥаттан саҥа тутуулар бөһүөлэкпитин киэргэтиэхтэригэр эрэнэбит”.