Бу күн хас да түһүмэхтээх күрэстэһии түмүгүнэн, Байаҕантай нэһилиэгин түмсүүтэ кыайыы-хотуу көтөллөннө. Кинилэртэн биир очукуонан хаалан мэҥэ-алданнар иккис, хаандыгалар үһүс буоллулар. Кыайыылаах хамаандаларга харчынан бириис туттарылынна.

Социальнай, культурнай хайысха управлениетын специалиһа Айаал Винокуров: “Хамаандалар аны сайын Мэҥэ-Алдан нэһилиэгэр ыытыллыахтаах республикатааҕы Ыччат ыһыаҕар аныыр эмблемаларын көмүскээтилэр. Ис дууһаларыттан кыһаллыбыттара харахха быраҕыллар. Холобур, мэҥэ-алданнар күөх хонуулаах, хатыҥынан тулаламмыт дойдуларыгар Эбэттэн тардыылаах кэнчээри ыччат силигилиирин айылҕаларынан көрдөрбүттэрин кэрэхсээтим. Кэскиллэргэ күн чаҕылыччы тыкпыта сырдыгы, кэрэни, билиини кэрэһилиир. Онтон сэргэ тула саламалаах ыччаттар оһуокайдыы сылдьаллара ыччат сомоҕолоһуутун көрдөрөр” - диэтэ.

Салгыы «Мозговой штурм» дьыалабыай оонньуу буолла. Онно кыһалҕаны хайдах туоратары, үлэни хайдах тупсарары быһаарыстылар. “Форт Боярд” көхтөөх күрэхтэһиигэ тополинайдар ордук бэлэмнээхтэрэ көһүннэ. “Я – лидер” куонкуруска Мэҥэ-Алдан нэһилиэгин түмсүүтүн лидерэ Анна Аммосова бастаата. Иккиһи байаҕантайдар лидердэрэ Айталина Охлопкова, үсүһү Хаандыга бөһүөлэгин ыччатын түмсүүтүн председателин солбуйааччы Ирина Алексеева ылла.

Айаал Константинович бэлиэтээбитинэн, маннык тэрээһин ыытыллара ыччакка тиһиктээх үлэ ыытылларын туоһулуур.