Быйыл Ыччат ыһыаҕа Томпо улууһугар ыытыллыаҕа

Томпо улууһугар ыччат уонна дьиэ кэргэн дьыалаларыгар миниистир Афанасий Владимиров салайааччылаах ыччат республикатааҕы XII ыһыаҕын тэрийэр хамыыһыйа кэлэ сырытта. Ыһыах быйыл Мэҥэ Алдан сэлиэнньэтигэр ыытыллар.



Бөлөх Мэҥэ Алдаҥҥа сырытта, ыһыах ыытыллар сирдэрин көрдө уонна олохтоох дьаһалта үлэһиттэрин, общественнай холбоһуктар актыбыыстарын, нэһилиэк тэрилтэлэрин салайааччыларын кытары көрсүһүү тэрийдэ. Ол кэнниттэн Хаандыгаҕа айаннаата.
Улуус дьаһалтатын мунньахтыыр саалатыгар киэҥ ыҥырыылаах мунньах буолла. Манна ыһыах тэрээһинигэр кыттар улуус тэрилтэлэрин соруктарын дьүүллэстилэр. Ураты болҕомто дьоҥҥо куттал суох буолуутугар уурулунна, тоҕо диэтэххэ, ыһыах ыытыллар сирин аттыгар күөл баар, чугаһынан Алдан өрүһэ ааһар. Онон ЫБМ үлэһиттэрин эргиччи дьуһуурустубалара олохтонуоҕа. Хас биирдии үлэһит сүктэриллибит соругун кыһамньылаахтык толороро ирдэниллэр.
Миниистир Афанасий Владимиров этэринэн, Ыччат ыһыаҕа - бу көннөрү бырааһынньык буолбатах, бу ыалдьыттарга бастыҥы, үчүгэйи көрдөрөргө кыах биэрэр түгэн. Оттон ыччат - бу биһиги кэскилбит, ыһыах тэрээһиниттэн инникитин Томпо улууһугар ыччат олороро уонна үлэлиирэ улахан тутулуктаах буолуон сөп.
Ыһыах ыытыллар сиригэр бэс ыйын 15 күнүгэр диэри - сүрүн репетициялар саҕаланыыларыгар - бары тутуулар хамыыһыйаҕа туттарыллыахтаахтар. Ол курдук, 400 миэстэлээх трибуна, улуус нэһилиэктэрин ахсаанынан 9 ураһа, 7 хорчуопка, санузеллар, душевойдар бэлэм буолуохтаахтар. Балары тутууга 3,5 мөл. солк. көрүллүбүт. Манна тендергэ олохтоох урбаанньыт Александр Свинобоев кыайбыт. Бырааһынньык режиссерунан биһиги биир дойдулаахпыт Евгений Ефимов буолар. Кини маассабай сыанаҕа 600-чэкэ киһини кытыннарар былааннаах, ол инниттэн чугастааҕы нэһилиэктэр олохтоохторун көмөлөһүннэриэҕэ. Саха сирин араас муннугуттан 3 000 ыалдьыт кэлэрэ күүтүллэр.
Маны таһынан мунньахха тутуллубут объектары кэлин хайдах көдьүүстээхтик туһанар туһунан кэпсэттилэр. Тэрээһин хаһаайыннара этэллэринэн, манна оҕолор сайыҥҥы сынньалаҥ лааҕырдара үлэлиэҕэ.
Нөҥүө күн делегация хайа-геологическай техникумҥа ыалдьыттаата, Хаандыгатааҕы искусство оскуолатыгар культура уонна үөрэҕирии эйгэтин салайааччыларын уонна үлэһиттэрин кытары көрүстэ.