Александр Соловьев бу мунньаҕы өрөспүүбүлүкэ баһылыгын сорудаҕынан ыытта. Саха сиригэр коррупцияны утары үлэ эрдэттэн сэрэтии, нэһилиэнньэ ортотугар маннык быһыыга-майгыга сөпсөспөт буолууну үөскэтии, коррупцияҕа бэлиэтэммит дьоҥҥо холуобунай уонна адинистративнай сойуолаһыыны олохтооһун курдук уопсайа үс хайысханан араарыллан үлэ ыытылларын кини бэлиэтээтэ.

«Саха сиригэр коррупцияны утарар политика олоххо киирэр. Быраабы кэһииттэн, дьонтон киирэр үҥсүүлэртэн көрдөххө, бу систиэмэ олоххо туһаныллыыта ситэритэ суох. Өрөспүүбүлүкэтээҕи, олохтоох бюджеттарга, баай-дуол комплексыгар ордук элбэхтэ коррупция түбэлтэтэ тахсар. Государственнай наадыйыыны хааччыйар атыылаһыыга быһыы-майгы сытыырхайан турар», -  диэтэ Соловьев.

Үөрэх эйгэтигэр коррупционнай быраабы кэһии элбэҕин кини ойуччу тутан бэлиэтээтэ. «Бу эйгэҕэ маннык 45 түбэлтэ тахсыбыта, ити быраабы кэһии 38,5% ылар. Олохтоох бэйэни салайыныыга быраабы кэһии иккис миэстэҕэ турар. Манна 39 түбэлтэ биллибитэ. Ити уопсай ахсаантан 33,3% ылар».

Бюджет үбүн-харчытыны туһаныыга хонтуруол ситэтэ суоҕун, күрэстэһии усуолуобуйатыгар кэһиилэр баалларын, о.д.а. туһунан кини чиҥэтэн эттэ.