Егор Борисов эппитинэн, үүммүт 2015 сыл ураты буолар чинчилээх. Кириисис кэмиттэн кэмигэр ааҥнаан ааһааччы. Ол эрэн Арҕааҥы дойдулар Россия ыытар сиэрдээх политикатын, Крым олохтоохторо историческай дойдуларыгар төннөргө көҥүл өттүнэн быһаарыы ылыммыттарын итинник хабырдык утарсыахтарын өтө көрбөтөхпүт диэтэ. Ил Дархан сабаҕалыырынан, нефть сыанатын түһүүтэ, омук үбүн (валюта) ырыынагар буккуллуу тахсыыта, онуоха эбии санкция биллэриллиитэ экономикабытыгар содуллаах буолуо.

«Үп-харчы татымсыйыан, федеральнай трансфербыт аччыан сөп. Ол иһин бюджеппытыгар бэйэ дохуотун үрдэтэр туһугар ылсан үлэлэһиэхтээхпит.

Иккиһинэн, бииргэ үлэлэһэр, сүрүн дохуоппутун киллэрэр улахан хампаанньаларбытыгар ыарахан балаһыанньа үөскээтэ. Итинэн сэдиптээн моно-куораттарбыт дьылҕалара, холобур, Мечелтэн сылтаан Нерюнгри дьылҕата, биһигини долгутар. Хампаанньалар бородууксуйаларын батарар ырыынактарын ис тутула уларыйда, кредит ылар кыахтара кыччаата. Арҕааҥы дойдулар кредит биэрбэттэр. Оттон Киин баан ставканы үрдэтэн, ис кредит эмиэ үрдүүр. Ити барыта тарыыптар үрдээһиннэригэр, сыана ыарааһыныгар суолу арыйыаҕа.

Тэрилтэлэр эргииргэ сылдьар харчылара биллэ татымсыйыаҕа. Ити барыта дьоҕус бизнескэ улахан охсуулаах буолуон сөп. Ол, биллэн туран, үлэ миэстэтин сарбыйыыга, ол аата үлэтэ суох дьон ахсаана элбээһинигэр тиэрдэр.

Хамнаһы концепция быһыытынан үрдэтиэхпит. Ол эрэн итиннэ тыырыллар үп эмиэ татым буолуон сөп. Ааспыт сылларга тэҥнээтэххэ, санкциялартан сэдиптээн экономикаҕа үбү угуу (инвестиция) кыччыыр чинчилээх», – диэтэ Егор Афанасьевич.

Ол да буоллар, Егор Борисов эрэннэрэринэн, бюджекка ылыныллыбыт социальнай эбэһээтэлистибэни бырабыыталыстыба барытын толоруоҕа. Кини кириисис нэһилиэнньэни, чуолаан тыа сирин олохтооҕун улаханнык хаарыйбатын туһугар үлэлэһиэхпит диэтэ. Былааннаммыт социальнай объектар бары тутуллуохтара.

Ил Дархан тоһоҕолоон бэлиэтээбитинэн, үөскээбит быһыыны-майгыны этэҥҥэ туоруур туһугар киэҥ көҕүстээх, түмсүүлээх, дьаныардаах буоларбыт ирдэнэр. Егор Афанасьевич көрсүһүүнү түмүктүүрүгэр «Урукуттан даҕаны кириисистэри туоруур уопуттаахпыт, бу да кэми этэҥҥэ ааһыахпыт», - диэтэ.