Кинини улуус дьаһалтатын баһылыга Евгений Слепцов биир бастакынан эҕэрдэлээтэ. Дойду президенэ В.В.Путин эҕэрдэ суругун, „Республика социальнай-экономическай сайдыытыгар кылаатын, үүнэр көлүөнэ иитиитигэр өҥөтүн иһин“ Саха Республикатын Ытык Сүбэтин бэрэссэдээтэлэ Люция Григорьева илии баттааһыннаах дастабырыанньаны уонна „Саха Республикатын бочуоттаах кырдьаҕаһа“ бэлиэни туттарда.

Субу күннэргэ үтүө үгэскэ кубулуйбут, сыл түмүгүнэн үлэ бары салааларыгар бастыҥнары быһаарар үөрүүлээх тэрээһиҥҥэ улуус бары муннуктарыттан дэлэгээссийэлэр кэллилэр. Бастыҥнары чиэстиир дьоро киэһэҕэ „Сыл бастыҥ бэтэрээнэ“ номинация кыайыылааҕынан Мария Петровна буолбутун дьон уруйдуу-айхаллыы көрүстэ. 100 сааһын томточчу туолбут ытык кырдьаҕас бу күн кэлэн бар дьонун иннигэр улуус баһылыгын илиититтэн Саха Республикатын „Үйэ саас“ бэлиэтин кэттэ, оттон куорат баһылыга киниэхэ „Орто Халыма куоратын бочуоттаах олохтооҕо“ буолбутун туоһулуур дастабырыанньаны туттарда.

Бу күн Мария Петровна эппит алгыс тылларын толору иҥэринэн, буолаары буолан кини ырыатын истэн сүүһүнэн киһи долгуйдубут, уйадыйдыбыт. Кини дьоһун, уһун үйэлээх олоҕо барыбытыгар холобур буоларыгар саарбахтааһын суох.

Бу күннэргэ улуус олохтоохторо Гиннесс рекордун олохтоору бэлэмнэнэ сылдьаллар. Ол курдук 40-тан тахса кыраадыс тымныыга аһаҕас халлаан анныгар үҥкүүгэ Мария Петровна эмиэ кыттар баҕа санаалаах.