Оччолорго үөрэх дьылын ортотуттан бүтүн тэрилтэни арыйыы — харах бүтэй сыалы табыыга тэҥнээҕэ. Ол эрээри ол кэминээҕи улуус баһылыга В.А.Григорьев өйөбүлүнэн, бастакы дириэктэрА.А.Томскай гимназия лицензиятын, үбүлээһинин, материальнай-техническэй базатын тэрийиини, ону кытта тыаттан кэлбит оҕолорго интернат дьиэни булууну ситиспитэ. Оттон үөрэх чааһыгар Е.Н.Токарева каадыры сүүмэрдээһининэн, үөрэх бырагырааматын оҥоруунан дьарыктаммыта. Ити кэмҥэ улуус үрдүнэн математикаҕа дьоҕурдаах оҕолору сүүмэрдээһиҥҥэ күүстээх үлэ ыытыллыбыта. Гимназия бастакы учууталларыттан биирдэстэрэ, билигин Хатыҥнаах нэһилиэгин оскуолатын дириэктэрэ А.В.Винокуров сүүрбүтүн-көппүтүн күн бэҕэһээ курдук саныыр.

Ити курдук, энтузиаст учууталлар күүстээх баҕа санааларын олоххо киллэрэн, улууска гимназия аанын тэлэччи арыйбыта.

Онтон ыла уон сыл субуллан ааһа оҕуста. Бу кэм устата гимназия эркиниттэн 156 оҕо олох киэҥ суолугар үктэннэ. Кинилэр республика, дойду, ону ааһан тас дойдулар үөрэҕин кыһаларгыгар ситиһиилээхтик үөрэнэллэр. Оттон гимназия бастакы хараҥаччылара номнуо идэ ылан, норуот хаһаайыстыбатын араас салааларыгар үлэлии-хамсыы сылдьаллар.

Күн бүгүн гимназияҕа 113 оҕо үөрэнэр, 20 педагог үлэлиир. Араас сылларга 2 оҕо кыһыл көмүс мэтээлинэн, 7 оҕо үрүҥ көмүс мэтээлинэн бүтэрбиттэрэ. Үөрэтии ФГОС бырагырааматыгар олоҕуран ыытыллар. Гимназия аныгы оборудованиенан хааччыллыыта үчүгэй.

Гимназия төрүттэниэҕиттэн төрөппүт кэмитиэтэ таһаарыылаахтык үлэлиир, номнуо үтүө үгэскэ кубулуйбут тэрээһиннэри ыытар, гимназия олоҕор күүс-көмө буолар.

Бу үөрүүлээх бэлиэ күнү көрсө гимназия улуус үөрэҕин үлэһиттэрин түмэ тарта. Икки күн устата манна аһаҕас уруоктар буоллулар, учууталлар үлэлэрин уопутун үллэһиннилэр, "Учитель года" куонкурус иитинэн семинар ыытылынна. Оҕолор күүстэринэн эҕэрдэ концерт туруорулунна. Манна үөрэнээчилэр искусство араас эйгэтигэр дьоҕурдарын көрдөрдүлэр.

Онон бары өттүнэн сайдыылаах ыччаты иитэр гимназия үлэтин кытта улуус олохтоохтор үөрэ билистилэр.