Иван Николаевич 1955 сыллаахха ыам ыйын 27 күнүгэр Амма оройуонугар Амма нэһилиэгэр учуутал дьиэ кэргэнигэр төрөөбүтэ. 1972 сыллаахха В.Г. Короленко аатынан Амма орто оскуолатын үөрэнэн бүтэрбитэ. 1973-1975 сс. Советскай армия кэккэтигэр сулууспалаабыта.

1981 с. Новосибирскайдааҕы тыа хаһаайыстыбатын институтун ситиһиилээхтик бүтэрэн, тыа хаһаайыстыбатын экономиһа идэтин ылбыта уонна тыа хаһаайыстыбатын эйгэтиттэн харыс да сири хамсаабакка дьоһуннаахтык, үрдүк таһаарыылаахтык үлэлээн кэллэ. “Победа” сопхуоска экономиһынан, Строд аатынан сопхуос сүрүннүүр экономиһынан үлэлээбитэ. 1990 сыл кулун тутар 25 күнүгэр сопхуос үлэһиттэрин уопсай мунньаҕын быһаарыытынан “Бөтүҥ” сопхуос дириэктэринэн талыллыбыта.

1996 сыл атырдьах ыйын 12 күнүттэн Иван Николаевич Емельянов Саха Республикатын Тыатын хаһаайыстыбатын министиэристибэтинэн Амматааҕы эт-үүт комбинатын дириэктэринэн ананан, олоҕун тиһэх күнүгэр диэри бу тэрилтэни үрдүк таһаарыылаахтык иилээн-салайан кэллэ.

“Амма” тыа хаһаайыстыбатын астыыр-үөллүүр кооперативын дириэктэрин, онтон бэрэссэдээтэлин быһыытынан, Иван Николаевич улахан үлэни ыытан кэлбитин бүгүн үрдүктүк сыаналаан бэлиэтиибит. Кини быһаччы туруорсуутунан уонна салалтатынан, 1998 с. саҥа хонтуора, 1999-2000, 2003 сс. Эмискэ, Сулҕаччыга, Өнньүөскэ арыы оҥорор сыахтар, Амма сэлиэнньэтигэр автозаправочнай станция тутуллан үлэҕэ киирбиттэрэ.

2002 с. Чапчылҕан нэһилиэгэр саҥа ас-үөл комплекса тутуллан, олохтоохтору сибиэһэй үүтүнэн, сүөгэйинэн, “Амма уута” ыраас уунан уо.д.а. бородууксуйанан тиһигин быспакка хааччыйа олороллор.

2004 с. Аммаҕа семенной инспекция хонтуората, 2005 с. “Прок-500” мини-комбикормовай завод, 2005 с. Болугурга арыы сыаҕа капитальнай өрөмүөнэ уонна реконструкцията, 2007 с. 4 бокстаах гараж тутуллубуттара. 2009 сыллаахха Абаҕаҕа, Бөтүҥҥэ, Сэргэ Бэскэ, Чакырга, Мээндигигэ, Соморсуҥҥа, Покровкаҕа үүтү тутар пууннар үлэҕэ киирбиттэрэ. 2009 с. Болугурга, 2014 с. Покровкаҕа 200-түү төбөҕө хотоннор тутуллубуттара.

И.Н.Емельянов салайбыт “Амма” тыа хаһаайыстыбатын астыыр-үөллүүр кооператива республикаҕа сыллата ыытыллар тыа хаһаайыстыбатын быыстапкаларыгар үрдүк ситиһиилээхтик кытталлар. Ол курдук, 2014 сыл балаҕан ыйыгар Хабаровскай куоракка ыытыллыбыт “Приамурская торгово-промышленная ярмарка” аан дойдутааҕы таһымнаах быыстапкаҕа 4 улахан кыһыл көмүс мэтээлгэ, Москва куоракка “Көмүс күһүн” дойду таһымнаах тыа хаһаайыстыбатын быыстапкатыгар 2 көмүс мэтээлгэ тиксэн, кыайыы көтөллөнөн кэлбиттэрэ.

2013 сыл түмүгүнэн, “Амма” тыа хаһаайыстыбатын астыыр-үөллүүр кооператива Саха Республикатыгар үлэ бары көрдөрүүлэрин түмүгүнэн бастыҥ үлэлээх кооператив буолары ситистэ. Бу барыта Иван Николаевич салайааччы быһыытынан үлэҕэ, олоххо мындырын, сатабылын, ирдэбилин, эппиэтинэһин көрдөрөр.

Иван Николаевичкиһи, гражданин, патриот быһыытынан республикатын, төрөөбүт Амматын улууһун тыатын хаһаайыстыбатын сайдарын туһугар олус кыһанара, ис сүрэҕиттэн ыалдьара, бэйэтин үлэтинэн, сэмэй майгытынан үтүө холобур буолара.

Иван Николаевич сырдык мөссүөнэ, ыраас дууһата биир дойдулаахтарын, бииргэ үлэлээбит-алтыспыт табаарыстарын, аймахтарын өйдөрүгэр-санааларыгар хаһан да өлбөөдүйүө суоҕа.