Ааспыт сыл түмүктэнээри турдаҕына, хаарбах дьиэттэн саҥа дьиэҕэ көһөрүү федеральнай программа чэрчитинэн, 24 квартиралаах дьиэ үлэҕэ киирбитэ. Сайын оройуон киинигэр Хонууга Улуу Кыайыы 70 сылын көрсө Кыайыы болуоссата саҥардыллан оҥоһуллубута, Муоматтан төрүттээх сэрии кыттыылаахтарыгар хара мрамор обелиск туруоруллубута. Эбээн норуотуттан бастакы учуонай, филологическай наука кандидата, поэт Василий Дмитриевич Лебедев төрөөбүтэ 80 сыла киэҥник бэлиэтэммитэ. Муома оройуонун территориятыгар турар Зашиверскай куорат тутуллубута 375 сылыгар оройуон салалтата былыргы куорат сиригэр-уотугар тиийэ сылдьыбыта.

Оройуон тыатын хаһаайыстыбатын өйүүр сыаллаах Улахан Чыыстай нэһилиэгэр табаһыттар уочараттаах слеттара ыытыллыбыта. Оройуоннааҕы киин балыыһа быраастара табаһыттар доруобуйаларын көрбүттэрэ-истибиттэрэ. Оройуоҥҥа таба иитиитэ тыа хаһаайыстыбатын биир саамай тутаах көрүҥүнэн буолар. Таба иитиитигэр баар кэккэ күчүмэҕэйдэри туоратыыга үлэ сорунуулаахтык ыытыллыан наада. Муомаҕа сылгы, ынах бүгүҥҥү күҥҥэ чааһынай илиигэ бааллар.

Ааспыт сылга Муома оройуонугар коммунальнай хаһаайыстыба, үөрэҕирии, ыччат, спорт, социальнай эйгэ, о.д.а. салааларга үлэ былааннаахтык барда. Бу күннэргэ оройуон салалтата саамай ыраах сытар Улахан Чыыстай нэһилиэгэр нэһиэлиэнньэни кытта көрсө барда, ол кэнниттэн Төбүлэх нэһилиэгэр сылдьыа.