Спорт дыбарыаһыгар субуоталаах өрөбүл күҥҥэ икки көбүөрүнэн барбыт хабыр хапсыһыылары дьон-сэргэ сэргээн, этэргэ дылы, тутуһан олорон амтаһыйа көрдө-иһиттэ. 55 киилэлээхтэргэ кыайыылааҕы быһаарар түмүк киирсиигэ Мэҥэ бөҕөһө Вячелав Федоров Бүлүүттэн төрүттээх ХИФУ студенын Василий Александрову бүдүрүтэн чемпион үрдүк аатын ыларын сэргэ спорт маастарын нуорматын толорон боччум ситиһиилэннэ. Оттон 90 киилэлээхтэргэ уон биир бөҕөс тустубутуттан спорт маастара отунан-маһынан оҥоһуллубатын Платон Саввинов (Үөһээ Бүлүү) уонна Юрий Старостин («Модун») бигэргэттилэр. Ааттаах-суоллаах бөҕөстөр бастакы миэстэни ылар иһин иэмэх мастыы эрийсиилэригэр Дьокуускай хапсаҕайдьыта сэрэтиинэн кыайыыны ыһыгыннарда.

Быйылгы түһүлгэҕэ монгол доҕотторбут ох курдук оҥостон, кустук курдук куоһанан кэлбиттэр - кыһыл көмүс, үрүҥ көмүс уонна боруонса мэтээллэри түөстэригэр иилинэн бардылар. Ыалдьыттарбытын биллиилээх дзюдоист, олимпиец, самбоҕа аан дойду икки төгүллээх чемпиона Эрхембаяр Содном салайан илдьэ кэллэ.

«Покровскайга бу иккис кэлиибит. «Хаҥалас хапсаҕайыгар» Улан-Батордааҕы «Алтай» спортивнай кулууптан алта бөҕөс, сүрүннээн самбонан, национальнай тустуунан - бөхийн барилдаанынан дьарыктанар уолаттар кытыннылар. Бу иннинэ доҕорбут Олег Иванов тэрийиитинэн нэдиэлэ курдук Хаҥалас тустууктарын кытта бииргэ эрчиллэн элбэҕи биллибит-көрдүбүт. Хапсаҕайы олус диэн биһирээтибит», - диэтэ СИА корреспонденыгар Эрхембаяр Содном.

Үгэс буолбут XVIII республикатааҕы «Хаҥалас хапсаҕайа-2015» күрэхтэһии кыайыылаахтарынан уонна призердарынан буоллулар:

55 кг (36 кыттааччы) – Федоров Вячеслав (Мэҥэ-Хаҥалас), Александров Василий (Бүлүү) уонна Егоров Александр (Үөһээ Бүлүү);

62 кг (65 кыттааччы) – Артемьев Вячеслав (Амма-ХИФУ), Николаев Петр (Кэбээйи) уонна Иванов Егор (Үөһээ Бүлүү);

70 кг (45 кыттааччы) – Прокопьев Рустам (Үөһээ Бүлүү), Донской Дмитрий (Үөһээ Бүлүү) уонна Бугулов Ньургун («Модун»).

80 кг (29 кыттааччы) - Акимов Дмитрий (Бүлүү-«Модун»), Кузьмин Эдуард (Таатта) уонна Софронеев Игорь (Нам-«Модун»);

90 кг (11 кыттааччы) – Старостин Юрий («Модун»), Саввинов Платон (Үөһээ Бүлүү) уонна Хурэлбатор Батбаяр (Монголия);

90 кг үөһэ (14 кыттааччы) – Николаев Николай (Бүлүү), Галбадрах Гантулга (Монголия), Тимофеев Увар (Үөһээ Бүлүү).

Ветеран-спортсменнар ортолоругар бириистээх миэстэлэри ыллылар:

60 кг (10 кыттааччы) – Дьячковский Захар (Дьокуускай), Афанасьев Кирилл (Дьокуускай) уонна Васильев Иван (Ньурба).

70 кг (13 кыттааччы) - Варламов Алексей (Мэҥэ-Хаҥалас), Игнатьев Сергей (Үөһээ Бүлүү) уонна Трофимов Прокопий (Алдан);

80 кг (7 кыттааччы) Каратаев Сергей (Кэбээйи), Сидоров Семен (Хаҥалас) уонна Сильвестров Иван (Мэҥэ-Хаҥалас);

80 кг үөһэ ( 10 кыттааччы) – Шагдар Гансух (Монголия), Константинов Вячеслав (Хаҥалас), Иванов Алексей (Сунтаар-«Модун»).