Чахчы, арыйдах ахсын ис хоһооно олус дириҥ, киэҥ, умсугутуулаах. Манна тиһиллибит сэһэн-сэппэн, ойуу-дьарҕаа булчуттарга эрэ буолбакка, тулалыыр эйгэни, көтөрү-сүүрэри сэргиир, сэҥээрэр дьоҥҥо, булт сиэрин-туомун, быраабылатын, ньыматын билиэн-көрүөн баҕалаахтарга анаммыта ордук кэрэхсэбиллээх. Эдэр ыччат сиһилии ааҕан, билсэн төрөөбүт төрүт айылҕатыгар харыстабыллаах сыһыаны олохтууругар, сахалыы тыыннаах буоларыгар сирдиир аналлааҕа улаханнык үөрдэр.

“Баай Байанай бэлэҕэр” булчут олоҕуттан-дьаһаҕыттан саҕалаан, араас дьикти кэрэ көтөргө-сүүрэргэ, кыылга-сүөлгэ, булчуттар былыргы маллларыгар-салларыгар, аныгы тэриллэргэ, булчут ыты иитиигэ, чуучаланы оҥоруу кистэлэҥнэригэр, бултан астаныллар ас-үөл талбытыгар, о.д.а. хас да түһүмэхтэринэн астына-дуоһуйа ааҕаҕын. Хоту дойду төрүт олохтоохторо булка тутуһар үтүө үгэстэрэ, итэҕэллэрэ ырылхайдык кэпсэнэрэ болҕомтону тардаллар. Биир тылынан, кинигэ аптаах хонуутугар ааҕааччыны сиэтэн киллэрэн, тулалыыр эйгэни кытта бүттүүн бииргэ буоларыгар сирдиир.

-- Икки сыл устат бүтүн хамаанда көмөлөөн үлэлээтэ. Ол түмүгэр кинигэ 480 сирэйинэн, өҥнөөх хаартыскаларынан, уруһуйдарынан киэргэтиллэн, 4000 тираһынан, СӨ бултанар уонна ураты харыстанар сирдэрин көрдөрөр каарталаах, ол эбэтэр анал сыһыарыылаах бэчээттэнэн таҕыста. “Кытыл” уонна “Салама” кинигэ таһаарар кыһалар кыттыгас бырайыактара буолла. Кылаабынай эрэдээктэр -- СӨ Булдун хаһаайыстыбатын департаменын иһинэн булду харыстааһыҥҥа (Госохотохрана) ГКТ дириэктэрэ Егор Антонов. Биһиги кини ыйыытынан-кэрдиитинэн, бары биир сүбэнэн-аманан үлэлээтибит. Дьоҥҥо-сэргэҕэ, ыччакка туһалаах буоллар ханнык диэн туох баар кыһамньыбытын уурдубут. Өбүгэлэрбит барахсаттар хас эмэ үйэлэри уҥуордаан муспут үтүө үгэстэрэ кэлэр кэнчээри ыччакка иҥэригэр баҕарабыт, -- диир кинигэ күн сирин көрөрүгэр үлэлэспит Туйаара Галактионова.