Сибээс миниистирэ Александр Борисов салайааччылаах бырабыыталыстыба делегацията бүгүҥҥүттэн Аллайыаха улууһугар нэһилиэнньэҕэ отчуотун саҕалаата. Бырабыыталыстыба чилиэннэрэ күн аҥара икки бөлөххө арахсан Быйаҥныырга уонна Бөрөлөөххө сырыттылар.

Бөрөлөөх нэһилиэгэ улуус кииниттэн Чокурдаахтан салгынынан 140-ча биэрэстэ тэйиччи сытар. Билигин манна сүүс сэттэ уонтан тахса киһи олорор. Сайынын, күһүнүн суоллара суох буолан, астарын-үөллэрин, таһаҕастарын сүрүннээн уунан уонна кыһыҥҥы суолунан таһаллар. Санатан эттэххэ, арктическай уонна хотугу улуустарга аһы-үөлү таһыынан “Якутоптторг” тэрилтэ дьарыктанар. Бөрөлөөххө маҕаһыын суох. Онон предприниматель Полина Рожина маҕаһыын аһан, бу тэрилтэни кытта дуогабардаһан аһы-үөлү атыылыыр эбит. “Саҥа дьыл иннинэ вертолетунан ас-үөл кэллэ. Атыылаатым. Ол эрээри хамнаспын ылбатым. “Якутоптторг” тэрилтэ кумааҕылары ыыппытын вертолет иһигэр бэрт ыксалынан илии баттыыгын. Онно туох суруллубутун киһи көрө да барбат. Онон тэрилтэ салайааччытыгар, бука, баһаалыста итини тириэрдиҥ”, - диэн этэр Полина Спиридоновна.

Салгыы кини нэһилиэккэ урукку өттүгэр кууруссалары, сибиинньэлэри маассабайдык иитэллэрин этэн туран, оннук уопуту салгыыр наадатын бэлиэтээтэ. “Табаны, сүөһүнү иитэр кыахпыт суох. Урукку курдук сибиинньэ, куурусса аҕаларгыт буоллар, биһиги иитиэ этибит. Тус бэйэм аҕыс сыл устата сибиинньэни иитэн олорбутум”, - диэн этэр предприниматель.

Дьон саҕалааһын быһыытынан кууруссаны, сибиинньэни атыылаһан син ииттиэ эбиттэр да, государствоттан көмө 500 кууруссаттан эбэтэр 200 сылгыттан элбэҕи иитэр эрэ буоллахха көрүллэр эбит. Бөрөлөөхтөр ити ыйыллыбыт сыыппараны кыччатан хотугу улуустарга көмө быһыытынан аҕыйахтыы кууруссаны, сибиинньэни ыытарга көрдөһөллөр. Улуус баһылыга Эдуард Слепцов бу хайысхаҕаүлэ ыытыллыахтаах, көмө салгыы сайыннаран иитиэн баҕалаах дьоҥҥо дуогабар быһыытынан бэриллиэхтээх диэтэ.

Аны туран суоллара-иистэрэ суох буолан, нэһилиэккэ быраастар десаннара тиийбэт эбит. Былырыын улууска кэлэн барбыт делегация Ныычалаахха уонна Бөрөлөөххө тиийбэтэх. Маны таһынан психологическай медицинскэй-педагогическай хамыыһыйа үс сылга биирдэ кэлэн барарынан, ахсыс көрүҥнээх оскуоланы бүтэрбит оҕо ыспыраапканы кыайан ылбакка, түмүк эксээмэҥҥэ киирэр кыаҕа суох буолар. Бөрөлөөх олохтооҕо Надежда Дьяконова бу хамыыһыйа сылга биирдэ хайаатар да улууска кэлэн барарын туруоруста. Маны сэргэ нэһилиэнньэ балыктааһыҥҥа бэриллэр квотаны уон сылга буолбакка, болдьоҕун арыый кылгатарга, суола-ииһэ суох сирдэргэ вездеходтары биэрэргэ этии киллэрдэ.

Бүгүн киэһэ делегация Чокурдаах олохтоохторун кытта көрсүөҕэ. Сарсын Русскай Устьеҕа, өйүүн Оленегарскайга отчуоттуоҕа.