Олохтоохтор ордук хото тыа хаһаайыстыбатыгар сыһыаннаах ыйытыылары биэрдилэр. СӨ транспорка уонна суол хаһаайыстыбатыгар миниистэрэ Семен Винокуров уонна СӨ айылҕа харыстабылыгар миниистирэ Сахамин Афанасьев тыа хаһаайыстыбатыгар сыһыаннаах ыйытыыларга төһө кыалларынан эппиэтээтилэр. Олохтоохтор былырыыҥҥы отчуокка тыа хаһаайыстыбатыттан бэрэстэбиитэл суоҕун туһунан ыйан туран, быйыл эмиэ кэлбэтэҕин өйдөөбөккө олороллорун эттилэр. Кырдьык, тыа хаһаайыстыбатыгар мунаахсыйар боппуруостара элбэх эбит.

Күүлэт түөрт нэһилиэгин (Үгүлээт, Тылгыны, I Күүлэт уонна II Күүлэт) олохтоохторо улуус кииниттэн ыраах олороллорун санатан туран, уматык боппуруоһугар ыарахаттары көрсөллөрүн эттилэр. Итини быһаарар сыалтан үс нэһилиэк суола таарыйан ааһар I Күүлэккэ заправкалыыр дьоҕус станцияны туруорары туруорустулар. Дьиҥэр, бу былааҥҥа турбута ыраатта эрээри, олоххо киирэрэ саарбах. Тоҕо диэтэххэ, уматыгынан дьарыктанар компаниялар ночооттоох бырайыагынан ааҕан, болҕомтолорун соччо-бачча уурбаттар. Сайыҥҥы өттүгэр, ардахтаах дьылга алларанан сырыы тохтуур буолан, заправкаҕа уматыгы тиэрдии уустугурар. Кыһын өссө син хааччыйыахтарын сөп. Онон маны быһаарар биир эрэ суол баар. Манна «Сахатранснефегазсбыт» ААУо ыраах сытар суола-ииһэ суох улуустарга, нэһилиэктэргэ уматыгы канистранан тиэрдэр өҥөтүн туһаныахха сөп. II Күүлэт баһылыга Светлана Игнатьева «Сахатранснефтегазсбыт» компанияны кытта бэлэм иһиттээх уматыгы атыылаһар туһунан кэпсэтиини ыыппыт. Билигин ону нэһилиэккэ тиэрдэр туһунан боппуруос быһаарыллыахтааҕын туһунан билиһиннэрбитин сэргии иһиттилэр. Онон уматык кыһалҕатын итинник быһаарыахтарын сөп эбит. Үгүлээт, Тылгыны уонна II Күүлэт нэһилиэктэрэ ити суолу тутуһалларыгар сүбэлээтилэр.

Олунньу 11 күнүгэр Бүлүү куоратыгар отчуоттаан баран, Семен Винокуров салайааччылаах бөлөх олунньу 12-14 күннэригэр Үөһээ Бүлүү улууһугар үлэлиэҕэ. Бу икки улууска сырыы туһунан сиһилии кэлэр нэдиэлэҕэ «Саха сирэ» хаһыакка ааҕыаххыт.