Арктическай уонна хотугу улуустарга предпринимателлэр үксүн атыынан-эргиэнинэн дьарыктаналлар. Ону сэргэ аҕыйах сылтан бэттэх олох-дьаһах өҥөлөрүн сайыннаран эрэллэр. Холобур, Аллайыахаҕа улуус киинигэр урукку сылларга гостиницалара суох буолан, командировкалаахтар кэллэхтэринэ олус эрэйдэнэллэрэ. Билигин чокурдаахтар үс гостиница арыйаннар, дьону түһэрии боппуруоһун быһааран олороллор. Маны таһынан улууска общественнай аһылыгы, кондитерскай өҥөнү тэрийии саҕаламмыт.

Улуус муниципальнай инвестиционнай программанан сылгыны, табаны атыылаһарга субсидия ылбыт. Билигин ити программанан Бөрөлөөх нэһилиэгэр Өймөкөөнтөн сылгылары атыылаһан аҕалбыттар. Сылгыһыттар этэллэринэн, төрүөх сыллата эбиллэн иһэр.

Ол оннугар табаны иитиикыаллыбатах. Улуус дьаһалтатыгар эппиттэринэн, табалар Аллайыаха климатын атыҥыраабыттар, ону сэргэ үлэһит илии тиийбэтинэн бырайыак олоххо киирэрэ кыайтарбатах. Манна даҕатан эттэххэ, бырабыытаслыстыба нэһилиэнньэҕэ отчуотун кэмигэр оленегорскайдар табаны фермаҕа көрүөхтэрин баҕаралларын эппиттэрэ, оттон бөрөлөөхтөр кууруссаны, сибиинньэни иитии боппуруоһун туруорсубуттара. Дьиҥэр, олохтоохтор таба, сылгы, куурусса иитиэхтэрин баҕараллар эрээри, суола-ииһэ суох тыйыс усулуобуйаҕа олорор буоланнар, кэлии-барыы, от-мас кыайтарбат.

Урукку өттүгэр хотугу улуустарга ас-таҥас барыта атын регионтан муора суолунан таһыллар буоллаҕына, билигин туох баар тутуу матырыйаала, кыстык оттуктара, астара-үөллэрэ барыта уу суолунан кэлэр. Ону да бэрт эрэйинэн. Ол иһин, ханна да тиийдэрбит, олохтоохтор бастакынан салгын, уу траснпорын туһунаныйыталаһаллар. Кинилэргэ уонна,бастатан туран, предпринимателлэргэ ити тыын боппуруос.

Эмиэ бүгүн сибээс миниистирэ Александр Борисов, Арктика дьыалаларыгар госкомитет председателэ Алексей Киселев биирдиилээн дьону кытта көрсөн кэпсэттилэр. Үөрэх, Доруобуйа харыстабылын, Үп министиэристибэлэрин бэрэстэбиитэллэрэ бэйэлэрин эйгэлэринэн бэсиэдэ ыыттылар.