Чурапчы улууһун Хадаарыгар гаас ситимин тардыыга үлэ-хамнас ааспыт сылтан саҕаламмыта. Араас сиртэн үлэһиттэр кэлэн, база туттан, үлэ күөстүү оргуйар. Ол курдук, турбалары ууруу, сири хаһыы, онтон да атын хабааннаах үлэ барар.

Бу күннэртэн Дириҥ - Хадаар хайысханан гаас ситимин тардыыга Михаил Охлопков салайааччылаах «Адгезия» ХЭТ үлэтин саҕалаата. Михаил Филиппович саха киһитэ буолан, сиэри-туому тутуһан үлэлиэххэ диэн, биһиги нэһилиэкпит уонна Хоптоҕо нэһилиэгин дьаһалтатын кытта кэпсэтэн, олохтоох алгысчыт, олоҥхоһут, ийэ тыл сүөгэйин-сүмэтин илдьэ сылдьар ытык киһибит Николай Петрович Тарасов ыллыктаах тылынан-өһүнэн алҕатан, аал уокка арыылаах алаадьынан, саламаатынан айах тутан көрдөстүлэр. Хадаар нэһилиэгин баһылыга Афанасий Степанов, Хоптоҕо нэһилиэгин дьаһалтатын баһылыгын солбуйааччы Анатолий Куприяновтыын ситиһиилээх, үтүө түмүктээх үлэни ыыталларыгар баҕа санааларын тиэртилэр.

«Адгезия» ХЭТ салайааччыта Михаил Охлопков бэйэтин өттүттэн үлэни болдьоҕор бүтэрэргэ бары күүс ууруллуоҕун туһунан эттэ. Бары үлэһиттэри сылаас саламаатынан, алаадьынан, буруолуу сылдьар сып-сылаас үүттээх чэйинэн күндүлээтибит, үлэ хаамыытын кытта үөрэ-көтө билистибит.

Эппит тыл хаалбат, оҥоһуллубут үлэ түмүктээх буолуо, аал уоттан көрдөһөн, күлүм уоту оонньотон, күөх төлөн кэлиитигэр сөптөөх дьаһаллары ыытыахпыт диэн бигэ эрэллээхпит.

 С.Н.ПЕТРОВА,

Хадаар нэһилиэгин баһылыгын

социальнай боппуруостарга солбуйааччы.