Үүнэр кэнчээри ыччаппыт инники олоҕо билиини-көрүүнү кытта алтыстын диэн киин куораттан айыы ойууна, норуот медицинатын ассоциациятын тэрийээччи В.А.Кондаков уһуйуллааччылара алгысчыттар тахсан аал уокка айах тутан, алгыс баһын сыалаатылар.

- Тутуу саҕаланыытыгар «Якутцемент» ААУо генеральнай дириэктэрэ Мамедов Алиш Забид-оглы көмөтүн умнар табыллыбат. Салгыы сүрүн бэдэрээтчигинэн Евлоев Руслан Хатанович дириэктэрдээх «ГлавУкс» ХЭТ буолбута. Манна элбэх киһи үлэлээбитэ. Оскуола үлэһиттэрэ, төрөппүттэр көмөлөрө эмиэ кырата суох. Бу тутууну сүрүннээн прораб Гурьев Андрей Николаевич үлэһиттэри булуталаан, хайысхаларынан наардаан үлэлэттэ. Кини баар буолан тутуу ситтэ. Дьиэ сылаас, төһө кыалларынан оҥоро-тута сатаабыттар. Тас өттүгэр сирэ көннөрүллэ, тротуара уурулла илик. Ситтэҕинэ-хоттоҕуна оҕолору тута олордуохпут - диэтэ СИА корреспонденыгар сэбиэдиссэй Зинаида Далбараева.

Үөрүүлээх тэрээһиҥҥэ тутууга үлэлэспит, көмөлөспүт дьоҥҥо үгүс махтал-баһыыба тыллара этилиннилэр. Прораб Гурьев Андрей Николаевичка уонна Охлопкова Светлана Еремеевнаҕа Бырабыыталыстыба махтал суруга, сэбиэдиссэй Далбараева Зинаида Прокопьевнаҕа Саха Өрөспүүбүлүкэтин үөрэҕириитин туйгуна аат, иитээччи Иванова Татьяна Николаевнаҕа улуус үөрэҕин салаатын бочуотунай грамотата, уһун сылларга иитээччи көмөлөһөөччүтүнэн үлэлээбит Мамедова Елена Петровнаҕа, Сивцева Анисья Ивановнаҕа махтал суруктара туттарылыннылар.