Тэрээһин үөрүүлээх чааһыгар алгысчыт Р.И. Попов урбаанньыттары үлэлэригэр ситиһиилэри, үтүөнү баҕаран туран аал уоту аһатан арчылаата, кэс тылын тиэртэ. Нэһилиэк баһылыгын солбуйааччыта П.П. Степанов бастыҥ үлэлээх урбаанньыттарга эҕэрдэ суруктары туттарда. Тэрээһин сүрүн чааһынан «Дьоҕус уонна орто урбаан кыһалҕалара уонна сайдыыта » диэн тиэмэҕэ “төгүрүк остуол” ыытылынна. Кэпсэтиини олохтоох урбаанньыттар салайааччылара С.Д. Николаева иилээтэ-саҕалаата. Кэпсэтиигэ С.С. Павлов, М.С. Тимофеева, Р.А. Игнатьева Урбаан сылыгар судаарыстыба өттүттэн туох өйөбүл оҥоһулларын, туох кыһалҕалар баалларын сиһилии кэпсээтилэр, сүбэ-ама, ыйытыыларга хоруйдары биэрдилэр.

“Төгүрүк остуол” түмүгүнэн резолюция ылылынна: тыа хаһаайыстыбатын сайыннарыыга саҥа тэриллэр хаһаайыстыбаҕа («Токой») үлэлиир усулуобуйаны, Арыылаах учаастагар сынньанар туристическай базаны тэрийэргэ, урбаанньыттары уонна бааһынай хаһаайыстыбалар салайааччыларын атын улуустарга, нэһилиэктэргэ ыытан уопут атастаһыытын тэрийэргэ, кыһыҥҥы суол сабыллыан иннинэ УОМ боппуруоһун, Сииттэ «МТС» салайааччытын боппуруоһун быһаарарга уо.д.а.

Бу күн быыстапка- дьаарбаҥка тэриллэн, ас-үөл хото атыыланна. Киэһэ сынньалаҥ киинигэр эҕэрдэ кэнсиэр буолла, үҥкүү-ырыа тохтоло суох дьиэрэйдэ. Урбаан сылын уруйдаан-айхаллаан уоттаах-күөстээх салют ньиргийдэ. Ити курдук биһиги нэһилиэккэ Урбаан сылын арыйыы бэрт тэрээһиннээхтик ааста.