Ити кэнниттэн Арыктаахха туох кыһалҕалар баалларын ыйыталаста. Нэһилиэк депутата Дмитрий Николаев саҥа тутуллубут оскуола тымныытын эттэ, сайыҥҥы уу ситимин бырайыага сиппэтэҕин, бөһүөлэк иһигэр аҕыйах кыраан турар гына оҥоһуллубутун эттэ. Сайын кэлэрэ 2-3 ый хаалбытынан, бырайыагы түргэнник көннөрөрү ыйда.

Учуутал Мария ТатариноваБалык музейын тэрийэр былааннаах үлэлии сылдьарын, кыра да буоллар, дьиэтэ баарын, кыра өрөмүөн оҥоһулларын, докумуоннары хомуйсуу үлэтэ барарын кэпсээтэ. Кини слайдары көрдөрөр аппарат уонна экран наадатын эттэ, оскуола тымныытыгар эмиэ тохтоото. Салгыы тыл эппиттэр оскуола тымныыта долгутарын, сайыҥҥы уу ситимин оҥоруу быйыл бүтэн, дьон туһугар үлэлииригэр баҕаларын эттилэр.

Көмө от суол суоҕунан кэлбэккэ турара этилиннэ. Ый кэриҥэ наар тибии буолан суол суох этэ. Бу күннэргэ эрэ Бүлүүттэн, Тыайаттан трактордар кэлэн суолбутун анньан биэрдилэр. Арыктаах, Чагда нэһилиэктэрэ ойуур баһаарыгар улаханнык эмсэҕэлээтилэр, элбэх оту уот сиэбитэ.

Степан Степанович бары кыһалҕалары бэлиэтэннэ, сыыйа-баайа быһаарсыахпыт диэн эрэннэрдэ.