Ньурбатааҕы ГОК-тан автобаза начальнига Ю.М. Антипин, учаастак начальнига Р.Р. Галиутдинов, Мирнэйдээҕи ГОК-тан биир дойдулаахпыт, МГОКа директорын солбуйааччы Б.С.Егоров, «Водоразделочные галечники» бириискэ механига П.С. Герасимов, кадры бэлэмниир бюро начальнига Е.С.Пранова, МУАД-тан суол-иис механизациятын базатын начальнига В.Е. Иванов, «АЛРОСА» АК кадры бэлэмнээһин кииниттэн үөрэтэр комбинат директора Д.А. Каширин, Мирнэйдээҕи индустриальнай колледжтан производственнай үлэҕэ директоры солбуйааччы Г.В. Иванова, Мирнэй куорат Дьарыктаах буолуу кииниттэн Т.В.Брызгалова, Н.С.Рыбкина бэйэлэрин тэрилтэлэрин билиһиннэрдилэр, Сунтаартан төһө ыччат хайдах үлэлии сылдьарын туһунан кэпсээтилэр.

Күнүстэн киэһэ «Олоҥхо» Култуура киинигэр тэриллибит үлэ дьаарбаҥкатыгар 180-тан тахса эдэр дьон кэлэн кытынна. Улуус нэһилиэктэриттэн, Аллайыахаттан, Баатаҕай Алыытыттан, Амматтан, Ньурбаттан кэлбиттэр. Дьаарбаҥка түмүгэр Ньурбатааҕы ГОК-ка 20, Мирнэйдээҕи ГОК-ка 25, Мирнэйдээҕи Дьарыктаах буолуу киинигэр 15 киһи резюмеларын биэрбиттэрэ билиннэ. Атын тэрилтэлэргэ үлэҕэ киириэн баҕалаах эмиэ элбэх. Эдэр уолаттартан ыйыталастахха: «Үлэ, үлэ наада. Үчүгэй, хамнастаах», — дэһэллэр.