Республикаҕа Россия Минюстын Управлениетын салайааччытын солбуйааччы Алексей Никифоров эппитинэн, итиннэ төһө эмэ сыра ууруллубутун иһин, өссө да элбэҕи оҥоруохха наада.

Кини этэринэн, дойдуга коррупцияны утары сокуон 2008 сыллаахтан оҥоһуллубута. Коррупцияны утары охсуһуу национальнай стратегията уонна национальнай былаана төрүттэммитэ. Итини таһынан, коррупцияны утары экспертиза киирбитэ, оттон билигин государствоҕа сулууспалааччылар барыстарын декларациялыыллар. Ол эрээри ити ситэтэ суоҕа көстөр.

«Дойдуга коррупцияны утары охсуһуу таһымын билэҕит. Элбэх дьайыы оҥоһуллубутун билиниэххэ, ол эрээри ити өттүгэр ситиһии наһаа үгүһэ суох», - диэтэ Никифоров, көрсүһүүнү арыйарыгар.

Минюст управлениетын баһылыга Ольга Романова СИА-ҕа эппитинэн, республикаҕа коррупция түгэннэрин нормативнай правовой акталарын суһаллык туоратыы үлэтэ таһаарыылаахтык ыытыллар. Онон, аһары маассабай буруйу оҥоруу тахсыбат.

«Республикаҕа ити үлэ ыытылларынан, биллэн турар, коррупция наһаа чаҕылхай көстүүлэрэ суохтар. Ол эрээри дьон биирдиилээн кэһиилэри таһаараллар, ити түгэннэри билэбит. кыһалҕалар бааллар, онон, ити хайысхаҺа салгыы үлэ ыытыллыаҕа», - диэн чопчулаата ведомство бэрэстэбиитэлэ.