Дьону-сэргэни социальнай страховкалааһынынан хааччыйар Саха сиринээҕи салаа ааспыт сылга 5426,5 мөлүйүөн солкуобай суумалаах дохуоттанан былаанын 101, 4 бырыһыан толорбут.

Ааспыт сылга регионнааҕы салааҕа үлэлии сылдьан 397 киһи дэҥнэммитин, 196 киһи идэлэриттэн сибээстээн ыалдьыбыттарын туһунан иһитиннэрии киирбит. Итилэртэн 275 киһи страховкалаах төлөбүр ылара быһаарыллыбыт. Үлэлэригэр сылдьан ыалдьыбыт 152 киһи медицинскэй, социальнай өттүнэн өйөбүлү ылар буолбут.

Үлэҕэ-хамнаска сылдьан дэҥ-оһол тахсыбатын, ыалдьыы аҕыйыырын туһугар сэрэтэр миэрэлэри туттууга болҕомто күүскэ туһаайыллар. Ол курдук, федеральнай сокуоҥҥа олоҕуран социальнай страховкалааһын фондугар иэһэ суох тэрилтэлэр сыллааҕы усунуостарыттан 20 бырыһыаны ылан сэрэтэр үлэни тэрийэллэрэ көҥүллэнэр. Кинилэр ити үбүнэн үлэ усулуобуйатын тупсарар, үлэһиттэригэр медицинскэй көрүүнү ыытар, санаторнай-курортнай эмтэниинэн хааччыйар кыахтаахтар.