Биллэрин курдук, үрүҥ ромашка – сэллиги утары охсуһуу сүрүн бэлиэтэ. 1911 с. сэллигинэн ыалдьар дьону эмтииргэ үп хомуйарга целлулоиднай үрүҥ ромашканы киэҥник атыылаан, акция тэриллибитэ.

М.И.Кершенгольц аатынан 9 №-дээх оскуолаҕа «Биһиги доруобуйабыт – биһиги илиибитигэр» оскуолалар икки ардыларынааҕы өрөспүүбүлүкэтээҕи VIII научнай-практическай конференция буолла. Конференцияҕа 19 оскуолаттан 101 үөрэнээччи уонна 8 учуутал кытынна. Ону сэргэ Хаҥалас уонна Мэҥэ-Хаҥалас улууһун Хаптаҕай орто оскуолата билиилэрин тургуттулар.

Нина Черных дириэктэрдээх 9 №-дээх оскуола сыл аайы «Ромашката атыылас – ыарыһах оҕоҕо көмөлөс» акцияны тэрийэн ыытар. Быйыл оҕо фтизиатриятын киинигэр 20 000 солкуобай суумалаах харчыны хомуйдулар.

Конференция кыттыылаахтарын СӨ Доруобуйа харыстабылын министиэристибэтин штаты таһынан кылаабынай фтизиатра, «Фтизиатрия» НПК дириэктэрэ, медицинскэй наука доктора Александр Кравченко эҕэрдэлээтэ.

Быйыл 8 секция үлэлээтэ. Дьүүллүүр сүбэ чилиэннэрэ оҕолор дакылааттарын тиэмэлэрин киэҥник сырдаппыттарын уонна бу хайысхаҕа чиҥ билиилээхтэрин бэлиэтээтилэр. Ону сэргэ «Буортута суох аһылык» оҕолор уруһуйдарын быыстапката буолла.

Конференция кыттыылаахтарыгар сертификаттары, оттон кыайыылаахтарга дипломнары уонна өйдөбүнньүк бэлэхтэри туттардылар.