Ахсынньы 9 күнүгэр түүн 1.30 чаас саҕана "Зодиак" кулууп аттыгар эр киһиэхэ саба түспүттэр. Эчэйбит киһи кэпсииринэн, кини «Зодиак» түүҥҥү кулуупка баран испит. «Манньыаттаах» ырыынак аттыгар кини «Жигули» массыынаны тохтоппут, онно үс киһи бааллар эбит. Тиийиэхтээх сиригэр тохтоон баран, кини суоппарга харчытын төлөөбүт, ол эрээри массыынаҕа олорооччулар итини кыра дии санаабыттар. Олортон биирдэрэ пассажиры охсуолаабыт, пневматическай бэстилиэтинэн куттаан, харчытын уонна сотовай телефонун былдьаабыт, ол кэнниттэн халабырдьыттар куотан хаалбыттар.

Хас да мүнүүтэ буолан баран, ГАИ үлэһиттэрэ массыынаны Красильников уулуссатыттан туппуттар.

Быһаарыллыбытынан, үс эдэр дьон Аллаараа Бэстээх олохтоохторо уонна куоракка икки күн иннинэ кэлбиттэр эбит. Тутуллубуттартан биирдэстэрэ урут уорууга буруйданан холуобунай эппиэтинэскэ тардылла сылдьыбыта билиннэ.

Холуобунай дьыала тэрилиннэ.