Арчы дьиэтигэр мустубут тыыл ветераннарын оройуон баһылыга Петр Черемкин эҕэрдэлээтэ.

– Аҕа дойдуну көмүскүүр Улуу сэрии сылларыгар оройуон олохтоохторо оборона фондугар 2 мөл. 15,4 тыһ. солк.үбү укпуттара. Бэйэни харыстаммат үлэлэринэн тыылга кыайыыны уһансыбыттара. Улуу Кыайыы 70 сылынан оройуон дьаһалтатын, депутаттар сэбиэттэрин ааттарыттан эһиэхэ, тыыл ветераннарыгар, дириҥ махталбын тиэрдэбин. Хас биирдиигитигэр этэҥҥэ буолууну, нус-хас олоҕу, ыраас халлааны баҕарабын, - диэтэ Петр Николаевич мустубут дьоҥҥо туһаайан.

Муоматааҕы ИдьМ отделын начальнига, полиция майора Василий Стрекаловскай эҕэрдэ тылыгар:

― Мин аҕам Улуу сэрии кыттыылааҕа этэ, Ийэ дойдутун көмүскээн ыраах сиринэн тэлэһийэн кэлбитэ, эйэлээх олоҕу тутуспута. Эһиэхэ бука барыгытыгар этэҥҥэ буолууну баҕарабын, – диэтэ.

Социальнай көмүскэл управлениетын салайааччы Прокопий Федоров эппитинэн, оройуоҥҥа 41 тыыл ветерана олорор. Кини тыылга кыайыыны чугаһатыспыт аҕа көлүөнэ дьоҥҥо ― чэрдээх илиилээх тыыл ветераннарыгар истиҥ махталын тириэртэ.

Оройуон баһылыга П.Н. Черемкин тыыл ветераннарыгар Е.Н. Боковаҕа, Е.Е. Старостинаҕа, Н.Е. Васильевка, А.А. Корякинаҕа, Н.С. Слепцовка, Л.Г. Слепцоваҕа, М.Г. Слепцоваҕа, М.Н. Слепцоваҕа, Е.И. Соркомоваҕа, И.С. Старковка, М.Р. Старковаҕа, М.Ф. Старковаҕа, А.Н. Хабароваҕа үбүлүөйдээх мэтээллэри туттарда.