Култуура управлениетын салайааччы Аксиния Сивцева бэлиэтииринэн, кыһыҥҥы фестиваль биир бэлиэ түгэнинэн Өймөкөөҥҥө аан дойдуттан Моруос Оҕонньоттор кэлиилэрэ үгүскэ кубулуйбута буолар.

Ол курдук, 2004 сыллаахха СӨ предпринимательство, дьарыктаах буолуу уонна туризм сайдыытын министрэ Анатолий Скрыбыкин көҕүлээһининэн Финдляндияттан Санта Клаус уонна Великэй Устюгтан Моруос Оҕонньор Өймөкөөн сиригэр ыҥырыылаах ыалдьыт быһыытынан аан бастаан үктэммиттэрэ. Бу аан дойдутааҕы таһымнаах Моруос Оҕонньоттор сырыыларын бастакы олуга этэ. Ол кэннэ 15 сылы быһа Моруос Оҕонньоттор Өймөкөөн сиригэр кыһыҥҥы туризм фестивалыгар мустан ааһар буоллулар.

Бу кэм устата Чысхаан төрөөбүт Өймөкөөнүгэр Великэй Устюгтан Моруос Оҕонньор, Финляндияттан Санта Клаус, Карелияттан Паккайнен, Ямал-Ненецкэй уокуруктан Ямал Ирин, Кострома Снегурочката, Башкирияттан Кыш Бабаай уонна Кар Кызын сылдьыбыттара, быйыл Польша Моруос Оҕонньорун ыалдьыттаата. Кинилэри ыалдьыттатар, биир сүбэҕэ аҕалар туризм биир символа -- “Санта Клаус Дьиэтэ” Томтор “Көмүс күрүөтүгэр” тутуллубута. Манна кэнники сылларга хоту сиргэ туризмы сайыннарыыга туһуламмыт араас таһымнаах “төгүрүк остуоллар” ыытыллар буоллулар. Маны таһынан, 15 сылы быһа аан дойдутааҕы таһымнаах Моруос Оҕонньоттор Тымныы полюһугар хараллар Тымныы символынан буолбут Хаар Кыырпаҕын Чысхаан Муус Резиденциятыгар – Томтор нэһилиэгин Эбэ Хайатыгар аҕалан харайаллара үгэскэ кубулуйда.