Республикатааҕы таһымнаах улуус киинин ыһыаҕа Сунтаарга бэс ыйын 25-26 күннэригэр буолуоҕа. Бу улахан тэрээһиҥҥэ бэлэмнэнии туһааннаах хайысхаларынан номнуо ыытыллар. 

Бу күннэргэ улуус баһылыга А.В.Григорьев председателлээх тэрийэр хамыыһыйа мунньаҕар ыһыах программатын, о.д.а. боппуруостары дьүүллэстилэр.

Улуус баһылыгын экономикаҕа солбуйааччы М.М.Прокопьев тэрээһин сметатын, спонсордааһын туһунан билиһиннэрдэ. Кини куоракка баар 10-ча улахан тэрилтэни кытта кэпсэтиини ыыппытын, Сунтаартан төрүттээх улахан тэрилтэ салайааччыларын кытта инникитин да кэпсэтиилэр ыытыллаллара наадатын эттэ. Быйылгы ыһыахха үбүлээһиҥҥэ күүс-көмө буолбуттарга маннык ааттар иҥэриллиэхтэрин билиһиннэрдэ: «генеральнай партнер» - 150 тыһ.солк.элбэҕи биэрбит киһи/тэрилтэ (ыҥырыы сурук, ВИП статус, парковкаҕа 1 массыынаҕа пропуск көрүллүө), «Главный партнер» - 100-150 тыһ.солк. иһинэн (парковкаҕа пропуск), «Официальный партнер» 50-100 тыһ.солк., «Партнер национального ысыаха» - 20-50 тыһ. солк. диэри, «Спонсор национального праздника ысыах» - 5-20 тыһ. солк. биэрбиттэр итинник ааттары сүгүөхтэрэ. Спонсордар ааттара, логотиптара иһитиннэрэр-көрдөрөр эйгэ нөҥүө киэҥник сырдатыллыаҕа, билбордарга, баннердарга күүстээх рекламалааһын барыаҕа.

Культура управлениетын начальнига М.А.Тараярова икки күннээх программаны билиһиннэрдэ. Манна улахан тэрээһиннэринэн буолуохтара: «Кулан кугас аттаах Куллустай Бэргэн» С.Зверев аатынан национальнай үҥкүү театрын туруоруутугар олоҥхо премьерата (туруорааччы режиссер А.Титигиров), «Тойукпут дуорайдын, оһуохайбыт олохтоннун, саргыбыт салалыннын» республикатааҕы фольклорнай фестиваль кыайыылаахтарын концера, «Сарсын, сарсын сарсыарда» төрүт үҥкүүтүгэр республикатааҕы күрэс, сэттэ поэтесса түһүлгэтэ, спортивнай күрэхтэһиилэр о.д.а.

Быйылгы ыһыахха ат сүүрдүүтэ киэһэ 10 чаастан ыытыллар буолла. Мария Афанасьевна: «Саха киһитэ күүтүүлээх ыһыаҕар дуоһуйа сынньаныахтааҕын, ыччат эрэ буолбакка, дьон-сэргэ хойукка диэри сылдьан, Күнү көрсүүгэ элбэх киһи сылдьара ордугун; ону тэҥэ ат сүүрдүүтүн күн утары буһан-хатан көрбөккө, сөрүүҥҥэ киэһэлик ыытылларын боруобалаан көрүөххэ» диэн этии киллэрдэ. Хамыыһыйа чилиэннэрэ бу этиини өр сөпсөспөккө, ырытыһан, куоластааһын түмүгүнэн ат сүүрдүүтүн киэһэ 10 чаастан ыытарга диэн куоластаатылар.

Улуус баһылыгын социальнай боппуруостарга солбуйааччы З.В.Иванова ыалдьыттары ыҥырыы, түһэрии, техниканан хааччыллыы боппуруостарыгар үлэ хайдах барарын, ким туохха эппиэттээҕин билиһиннэрдэ. Тустаах боппуруостарынан подкомиссиялар тэриллэллэрин эттэ. Уһун Күөл ыһыаҕар хочо нэһилиэктэрэ бары кыттыһан, күүс-көмө буолан тэрийсиэхтээхтэрин, Элгээйигэ  эмиэ кыттыһан, көх-нэм буолаллара сорудахтаммытын иһитиннэрдэ. Бу ыһыахтар тэрээһиннэригэр культура үлэһиттэрэ күүскэ үлэлэһэ сылдьалларын өссө төгүл бэлиэтээтэ.

Бэрээдэги көрүүгэ-истиигэ, хонтуруоллааһыҥҥа эмиэ улахан болҕомто ууруллар. Полиция үлэһиттэригэр көмөлөһөөччү быһыытынан дружинниктар үлэлиэхтэрэ, маныаха видеонаблюдение эмиэ күүскэ туһаланыа.

Сунтаар нэһилиэгин баһылыгын солбуйааччы В.С.Макаров ааспыт ыһыахха «Оргкомитет», «VIP», «Пропуск» бэлиэлэри дьон бэйэтэ өҥнөөх принтергэ таһааранынан анал парковкаҕа, паркаҕа киирэргэ улахан мэһэйдэри үөскэппитин эттэ. Онон быйыл Москваҕа галограммалаах пропустары сакаастаабыттарын иһитиннэрдэ.

Элгээйи нэһилиэгин баһылыга Гаврил Яковлев нэһилиэктэргэ ыһыахтар бэс ыйын 29-30 күннэригэр буолалларын иһитиннэрдэ. Бэлэмнэнии үлэ эмиэ күргүөмнээхтик ыытылла турарын эттэ. Нэһилиэктэр кэлэллэригэр-баралларыгар техника боппуруоһа, дьоҥҥо усулуобуйа олохтонуон наадатын бэлиэтээтэ.

Мунньах кыттыылаахтара манны тэҥэ Күн тахсыытын бириэмэтин чуолкайдыыры, ыһыах кэмигэр парка ыраас буолуутугар волонтердар үлэлэрин, аппаратура, паром түүннэри сылдьыытын, ипподром отсыпкатын о.д.а. элбэх боппуруостары, кыһалҕалары кэпсэтистилэр.

Мунньахха баһылык Анатолий Васильевич тэрээһин барыта этиллибит кэмигэр, дьону күүттэрбэккэ саҕаланыахтааҕын өссө төгүл тоһоҕолоон эттэ.

Сарсыҥҥы күнүгэр улуус баһылыга А.В.Григорьев, экономикаҕа баһылыгы солбуйааччы М.М. Прокопьев социальнай боппуруостарга баһылыгы солбуйааччы З.В.Иванова, нэһилиэк баһылыгын солбуйааччы В.С.Макаров паарканы кэрийэн көрдүлэр. Ол түмүгэр ыһыах кэмигэр оһуохай пааркаҕа бүтүннүүтүгэр иһиллэрин наадатыгар 5 рупор туруоруллуохтааҕа, пааркаҕа киирэр сиргэ Сунтаар гербэтэ уонна Улуу Кыайыы 70 сылыгар анаммыт баннердар баар буолуохтаахтара этилиннэ.

Тимур ИВАНОВ, улуус баһылыгын көмөлөһөөччүтэ.