Рабочай сырыы Түбэй-Дьаархан, Күүкэй, Күндэйэ, Кэмпэндээйи нэһилиэктэриттэн саҕаланна. Миниистир Александр Еремеевич Күүкэйгэ «Уйгу» ХЭТ (салайааччы Д.П.Федоров), Кэмпэндээйи нэһилиэгэр туус хостуур компанияҕа, Күндэйэҕэ сырытта.

Күүкэй нэһилиэгэр агро-оскуола үөрэнээччилэрэ оҕурсу, хаппыыста рассадатын үүннэрбиттэрин көрдө. Оҕолор 1,5 га сиргэ хортуоппуйу уонна 4,5 га сиргэ хаппыыста олордор былааннаахтарын кэпсээтилэр. Оскуолаҕа биир УАЗ массыыналаахтар, икки «Беларусь», биир «Синтай» трактордаахтар.

Иккис күн Хочо эҥэр сырыы буолла. Тойбохойго «Хочо» МУП үлэһиттэрэ суорат, йогурт, чохоон о.д.а. хайдах оҥороллорун  көрдөрдүлэр, кэпсээтилэр.

Салгыы Тойбохойдооҕу оҕо дьиэтигэр сылдьан, иитиллээччилэри Оҕо көмүскэлин күнүнэн эҕэрдэлээтилэр. Александр Еремеевич үүт, арыы бородууксуйатын ылалларыгар сертификат, оттон улуус баһылык Анатолий Васильевич музыкальнай аппаратура туттаран оҕолор барахсаттар үөрүүлэрин үксэттилэр.

Кириэстээххэ 300 га хорутулла сылдьар бааһынаҕа сырыттылар. Аатырбыт ыанньыксыт В.А.Михайловтыын көрсөн, хайдах ынах ордук үүттээх буоларын кэпсэтистилэр, олохтоохтор убойнай пуун тутуллара былааннанарын эттилэр. Куокунуга улахан Табаҕаҕа үлэни-хамнаһы билистилэр.

Сырыы үһүс күнүгэр А.Е.Артемьев Сунтаарга тыа хаһаайстыбатын үлэһиттэрин кытта көрүстэ. Предприниматель В.А.Ананьев хотон туттар былааннааҕын кэпсээтэ, «Лоҥкур» хаһаайыстыба баһылыга А.Н.Попов 144 төбө сүөһүнү көрө-истэн туруорарын эттэ. «Тирэх» кооператив салайааччыта А.Н.Барашкова сироп, барыанньа оҥорорун көрдөрдө, кэпсээтэ.

Сунтаардааҕы технологическай колледжка буолбут көсүһүүгэ А.Е.Артемьев үөрүүлээх быһыыга-майгыга алта биир дойдулаахпытыгар министиэристибэ наҕараадаларын туттарда.

СӨ тыатын хаһаайыстыбатын, ветеринариятын сайдыытыгар кылааттарын, өр сылларга таһаарыылаах үлэлэрин иһин «Саха Өрөспүүбүлүкэтин тыатын хаһаайыстыбатын туйгуна» бэлиэнэн: Туойдаах ветеринария пуунун сэбиэдиссэйэ Людмила Петровна Копылова, Кэмпэндээйи нэһилиэгин тыа хаһаайыстыбатын специалиһа Александра Николаевна Герасимова уонна «Кириэстээх» ТХПК үүтү учуоттуур үлэһитэ Олимпиада Петровна Ляшеева; тыа хаһаайыстыбатыгар уонна агропромышленнай комплекс эйгэтигэр үтүө суобастаах үлэлэрин иһин министиэристибэ Бочуотунай грамоталарынан: Кириэстээх совхоһугар 40 сыл ветеринарнай бырааһынан үлэлээбит Климент Ильич Николаев, Тойбохой нэһилиэгин олохтооҕо, предприниматель Валентина Васильевна Дмитриева; СӨ тыатын хаһаайыстыбатын сайдыытыгар кылаатын, өр сыллаах таһаарыылаах үлэтин иһин «Саха сирин тыатын хаһаайыстыбатын ветерана» бочуоттаах бэлиэнэн Серафим Павлович Васильев наҕараадаланнылар.

Миниист р рабочай сырыытын кэмигэр улуус кураторынан биир дойдулаахпытын Александр Герасимовы анаата, үс күннээх сырыытын түмүгүнэн улуус хаһаайыстыбалара ханнык программаларга үлэлэһиэхтэрин сөбүгэр сүбэ-ама биэрдэ.

Тимур ИВАНОВ, улуус баһылыгын көмөлөһөөччүтэ.