«Эһиги биһиэхэ көннөрү тэрилтэҕэ эмтэнииттэн атыннык эмтэнэр кыахтаныаххыт. Сүрүнэ – «Абалаах» күөл ураты эмтээх бадараанынан эмтэнии. Уунан эмтэнии, минеральнай ванналар — сульфиднай, углекислай, кислороднай, йодобромнай уонна да атын бааллар», - диэн кэпсээтэ СИА-ҕа "Якуткурорт" хампаанньа менеджерэ Ньургун Григорьев.

Кини этэринэн, уунан сайҕаныы – душ Шарко сүрэхтэрэ-тымырдара уонна ньиэрбинэй систиэмэлэрэ ыалдьар дьоҥҥо туһалаах. Уу аннынааҕы душ-массаж хаан эргииригэр, атах-илии ыарыыларыгар туттуллар.

«Эмтэнэр физкультура уонна эрчиллэр саала тирэнэр-хамсанар систиэмэлэрэ мөлтөх дьоҥҥо сүрүннээн көрүллэр. Итини таһынан эһиги манна аппаратынан физиотерапия, массаж, ультразвуковой ингаляция, сытынан, эминэн эмтэнии өҥөлөрүн ылыаххытын сөп (укуол, тымырга хааппыланан куттарыы уонна да атын). Эмтэниини аныырга лабораторнай уонна функциональнай диагностика ыытыллар. Ыарыы эбэтэр эчэйии кэнниттэн чөлүгэр түһэрэр эмтэниини ааһар кыахтааххыт. Эмтэнэ киирэргэ бырааскытыттан толору сурук, паспорт, страховой медицинскэй полис, СНИЛС ирдэнэр», - диэн бэлиэтээн эттэ Григорьев.

Аадырыһа: Дьокуускай куорат, Петр Алексеев уул., 89, («Хоту» водогрязелечебница дьиэтэ), «Манньыаттаах» тохтобулга диэри 5, 6, 25, 35 №-дээх автобустарынан тиийиҥ. Ыйыталаһар телефоннаргыт: 432301, 432413, 251767.