Тэрилтэ дириэктэрэ Гриша Фероян суотабай төлүөпүөнүн  нүөмэрин булан, киниэхэ эрийдим. Адьас истиэ суоҕа дии санаабытым, иһиттэ. Ити буолбут айдааҥҥа бэйэтин санаатын үллэстэригэр  эттим. Онуоха  тута солото суоҕун  эттэ  уонна   тэрилтэтин  юриһын суотабай төлөпүөнүн нүөмэрин биэрдэ. Салгыы  юрист төлөпүөнүгэр эрийдим, эмиэ тута иһиттэ. Суруналыыспын истээт, тута ньиэрбинэйдээн барда уонна сэттэ этээстээх ыыс-бурут тылларын этэн баран, төлөпүөнүн арааран кэбистэ. Туһа тахсыа суох диэн салгыы эрийбэтим.

       Санатар буоллахха, Строд уулуссаҕа олорор олохтоохтор Дьокуускай куорат баһылыга Айсен Николаевка уонна борокуротуураҕа предприниматель дьиэ сыбаайатын атын дьиэлэр тэлгэһэлэригэр түһэрэн тутууну ыытан эрэрин туһунан үҥсүбүттэрэ. Маны истээт, Айсен Николаев алтынньы 10 күнүгэр бу объект тутуллуохтаах учаастагар тиийэн билсибитэ. Ити сырыы кэнниттэн  куорат баһылыга  бу боппуруоһу  борокуротуура  уонна  СӨ тутууга, олорор дьиэни кэтээһиҥҥэ судаарыстыбаннай управлениета быһааралларыгар уонна  бу тутуу салгыы барарын тохтоллоругар эппитэ. Ол эбэтэр төһө да сири бас билбиттэрин иһин тугу санаабыттарынан  тутууну ыытар  уонна  Градостроительнай сокуон  хайаан да тутуһуллуохтааҕа этиллибитэ. “Арай, Арменияҕа итинник тутуохха сөбө буолуо. Онтон ол биһиэхэ сатаммат”, -- диэн  Айсен Николаевич быһаччы хардарбыта.

   Фероян тугу сыыста?

      Дьокуускай куорат кылаабынай архитектора Ирина Алексееваны көрсөн, тутааччы тугу сыыспытын, кэспитин  ыйыталастым.   “Строд уонна Чепалов уулуссалар икки ардыларыгар баар анал учаастакка генеральнай бырайыак быһыытынан  дьиэ тутуллуохтаах.   Ол гынан баран, тутааччы  бас билэр учаастагыттан тахсан,   тэлгэһэҕэ   өтөн киирэн, сыбаайаны атын сиргэ түһэрбит. Дьиҥэр, кини тутуохтаах дьиэтин бырайыагын биһиэхэ бэрэбиэркэлэтиэхтээх этэ. Биир тылынан,  ону ааспатах.  Гриша Фероян этэринэн, учаастак кини бас билиитигэр баар.   Сокуон быһыытынан, төһө да сирдээҕин үрдүнэн,  хайаан да бырайыактаах  уонна тутууну ыытарыгар көҥүллээх буолуохтаах этэ. Ол эбэтэр,   экспертизаны ааспытын туоһулуур Дьокуускай куорат кылаабынай архитектора бигэргэппит докумуона.    Кини ханнык даҕаны бырайыагы оҥорторбокко уонна   тутуу көҥүлүн ылбакка эрэ  дьиэ сыбаайатын ылла да саайан барбыт”, – диэн Ирина Дмитриевна хоруйдаата.

Ама, билбэтэ буолуо дуо?

      Тутааччы  Гриша Фероян ханнык баҕарар  объект  бырайыага тустаах тэрилтэлэргэ хайаан да бэрэбиэркэни ааһыахтааҕын, ама, билбэтэ-көрбөтө  буолуо дуо диэн ыйытыы үөскүүр?  Интернет ситимигэр  көрдөххө, “Норд спецстрой 1” ХЭТ  тутуу бары көрүҥүнэн дьарыктанар  кыахтаах диэн ыйыллар.  Тэрилтэ анал регистрацияны ааһан,  1999 сыл атырдьах ыйын 5 күнүгэр тэриллибит.  Офистара  Жатай бөһүөлэгэр баара ыйыллыбыт. Хампаанньа сүрүн үлэлиир хайысхата диэҥҥэ “Общестроительные организации” диэн  суруллубут.

   Гриша Фероян,  кыра оҕо туох эрэ буруйу оҥорбутугар этэр курдук, «сыыһа гыммыт» диэтибит.   Ити сыыһата кумааҕыга эрэ тиһиллэн хаалбатар  эбэтэр   сарсыардааҥы дьыбарга хаһыытаабыппыт ой дуораана буолан, симэлийэрин  курдук симэлийбэтэр ханнык этэ. Градостроительнай кодекс ыстатыйата кэһии тахсыбыта  сымыйа буолбатах! Онно толору эппиэттиэхтээх. Оччоҕуна итинник нүдьү-балай сыһыаннааһыы суох буолуо этэ.

    Салайааччылар  эппиэттэрэ 

Сокуон булгуччу тутуһуллуохтаах 

“Саха сирин тутааччыларын сойууһа» коммерческэйэ суох  партнерство  –   бэйэни салайынар  тэрилтэ генеральнай дириэктэрэ Айхал Габышев:

– Биһиги  сокуоннаах, бырааптаах  судаарыстыбаҕа олорорбут быһыытынан ону хайаан да тутуһуохтаахпыт.  РФ тутууга кодексын 51 ыстатыйатыгар  тутуу көҥүлэ эрэ баар буоллаҕына, дьиэни тутуу ыытыллыахтааҕын туһунан  ырылыччы суралла сылдьар. Бу ирдэбили кэспит тэрилтэҕэ 500 тыһ. – 1 мөл. солк кээмэйдээх административнай ыстыраап түһэриллэр. Итини тэҥэ, тэрилтэ салайааччыта 20-50 тыһ. солк ыстырааптанар. Эбэтэр 90 күҥҥэ диэри тутууну ыытара тохтотуллар.

«Норд Спецстрой 1» ХЭТ тутууну  анал көҥүлэ суох саҕалаан, РФ тутууга кодексын 51-с ыстатыйатын кэспит. Бу тутуу улахан кэһии буолар. Онон бу боппуруоһу быһаарыынан тустаах уорганнар дьарыктаныахтарын наада.

«Норд Спецстрой 1» ХЭТ  “Саха сирин тутааччыларын сойууһа» коммерческэйэ суох  партнерство  –   бэйэни салайынар  тэрилтэҕэ чилиэн буолбатах. Биһиги бу буолбут быһыы  сөптөөхтүк быһаарыллыа диэн эрэнэрбитин биллэрэбит. 

Сөптөөх миэрэ ылыллыаҕа 

  СӨ тутууга уонна  олорор дьиэни кэтээһиҥҥэ судаарыстыбаннай управлениетын салайааччы Наталья Чусовская:

-- Сокуон ирдэбилинэн  управленияҕа  тустаах дьонтон  объегы тутуу  саҕаламмытын туhунан иhитиннэрии киирдэҕинэ эрэ  бэрэбиэркэлиибит.  Ол курдук,  Строд уулуссатыгар элбэх кыбартыыралаах дьиэни  тутуу  саҕаламмытын туhунан иhитиннэрии тутааччылартан баччааҥҥа диэри киирэ илик

Ити учаастакка көҥүлэ суох тутуу үлэтэ бара турарын туһунан Дьокуускай куорат дьаһалтатыттан, Автодорожнай уокуруктан уонна олохтоохтортон үҥсүү-сурук киирбитэ. Бүгүҥҥү  күҥҥэ Дьокуускай куорат борокуротуурата  көҥүлэ суох тутууну бэрэбиэркэлээһини  саҕалаата. Манна  биhиги управлениябыт исписэлииһэ кыттыаҕа.  Бэрэбиэркэ түмүгүнэн сөптөөх миэрэ ылыллыаҕа.