Сырыытын кэмигэр кини салгынынан айаннааһыны тэрийии Бөдөҥсүтүллүбүт киинин тутулла турар эбийиэгин, ону таһынан Дьокуускайдааҕы авиационнай-техническэй училищеҕа сырытта.

Салгыы кини «Аэропорты Севера» ФКП аэропортарын комплексын сөргүтүү программаламмыт тэрээһиннэрин олоххо киллэрии боппуруостарыгар мунньах ыытта. Росавиация баһылыга республика иэнигэр баар 15 аэропортарын уларытан тутууга көрдүүр үлэлэри суһаллык саҕалыыр наадатын эттэ. Кини этэринэн, 2018 сыллаахха диэри Дальнай Восток уонна Байкаллааҕы регион сайдыыларын федеральнай целевой программалара Саха сиригэр 30 млрд солк кэриҥэ үбү биэриэҕэ.

«Кырдьык, ыраах сытар сирдэргэ ити эбийиэктэри сөргүтүү уонна тутуу уустуктардаах. Бу кэлим үлэлэри Росавиация, Федеральнай казеннай тэрилтэ, Саха Республикатын правительствотын, оройуоннар администрацияларын хардарыта дьайсыыта суох олоххо киллэрэр кыаллыбат», - диэн бэлиэтээтэ Александр Нерадько.