Тэрээһиҥҥэ нэһилиэктэр баһылыктара, тэрилтэлэр салайааччылара, ыччат уонна дьиэ кэргэн политикатыгар Министерство, «Россия студеннарын этэрээттэрэ» Саха сиринээҕи штабын уонна волонтердары кытта үлэ Киинин, «Лига Саха КВН» ыччат общественнай тэрилтэтин бэрэстэбиитэллэрэ кытыннылар.

«Элбэх хамнас» – бу үлэ миэстэтин буларга быһаарар оруоллаах дуо? Билиҥҥи ыччат үрдүк ирдэбиллэригэр туох сабыдыаллыырый?  Кэпсэтии кыттыылаахтарыгар итинник ыйытыылары биэрдилэр. Үгүстэр итиннэ саамай улахан «өҥөнү» төрөппүттэр оҥороллор диэн санааҕа кэллилэр, кинилэр бэйэлэрэ да билбэттэринэн атаах, общество уларыйыыларыгар бэлэмэ суох, бэлэмҥэ иитиллибит дьону иитэн таһаараллар.

Баар дьонтон үгүстэрэ Алтан нэһилиэгин баһылыга Николай Тимофеев санаатын кытта сөбүлэстилэр. «Ити ыччаты үлэҕэ көҕүлээһин суоҕуттан тахсар. Үлэ – олох төрдө. Быыкаа эрдэҕиттэн оҕо үлэҕэ үөрэниэхтээх, ол түмүгүн көрүөхтээх. Бары баай дьон үптэрин бэйэлэрэ илиилэрин араарбакка, сылайары билимэккэ үлэлээн оҥорбуттара. Оттон билигин төрөппүттэр оннооҕор оҕолоро субуотунньукка эбэтэр хомунууга кэлэн «кирдээх» үлэни оҥоруохтарын баҕарбаттар, өссө сорохтор кыыһыраллар», - диэтэ кини.

Ыччат өссө биир кыһалҕатынан үлэ суоҕа буолар. Эдэр киһи, специалист үлэҕэ киирэригэр кыһалҕа суох. Кыһалҕа ыччат үлэлиэн баҕарбатыгар сытар.  «Үлэ баҕас баар, үлэлиэххэ эрэ наада», - диэн бэлиэтээтэ нэһилиэнньэ дьарыктаах буолуутун киинин салайааччыта Мария Федорова.

Көрсүһүү кыттыылаахтара олус элбэх этиилэри, санаалары эттилэр. Эдэр дьон аҕа саастаах дьон санааларын, этиилэрин олус болҕойон, өрө көтөҕүллэн иһиттилэр.

Ыччат аатыттан тылы  Айсен Белолюбскай эттэ. Уол тэрээһини: «Мин төрөөбүт дойдум кэскилэ – мин илиибэр», диэн түмүктээтэ, диэн ыччат министерствотын пресс-сулууспата иһитиннэрэр.