Миниистири кытта көрсүһүүгэ улуус бары нэһилиэктэрин баһылыктара уонна тыа хаһаайыстыбатын управлениетын бэрэстэбиитэллэрэ кэллилэр. Иван Слепцов 2013 сыл устата барбыт үлэ туһунан, тыа хаһаайыстыбатын сайдыытыгар саҥа хамсааһыннар тустарынан кэпсээтэ уонна ыйытыыларга  хардарда.

Кини бэлиэтээбитинэн, ааспыт сыл түмүгүнэн, Кэбээйи улууһугар тыа хаһаайыстыбатын сайдыытыгар көрдөрүү куһаҕана суох, ол эрээри табаны иитиигэ улахан болҕомтону ууруохха наада. Сэбээн-Күөлгэ ити салааҕа уустук балаһыанньа үөскээтэ. Табаны иитэр общиналар үтүө холобурдарын быһыытынан кини Анаабыр, Уус-Дьааҥы уонна Аллараа Халыма улууһун хаһаайыстыбаларын аҕалла. Итини таһынан миниистир племенной сүөһү сайдыытыгар, сүөһү аһылыгын, материальнай-техническэй базаны, саҥа механизмнары уонна технологиялары  киллэриини тупсарыыга ураты болҕомто уурууга туһаайда. Ити үлэ түмүгэр Кэбээйи улууһугар  тыа хаһаайыстыбатын сайдыыта быйыл 5 %-тан намыһҕа суох улаатыахтаах.

«Туймаада-Лизинг» генеральнай директора Семен Иванов кини лизинговай хампаанньата тыа сирин нэһилиэнньэтин техниканан уонна тыа хаһаайыстыбатын оборудованиетынан хааччыйыы, кыра уонна орто предпринимательство сайдыытын хайысхаларынан үлэлиирин кэпсээтэ. Ону таһынан 2011 сыллаахтан хампаанньа бөдөҥ агропромышленнай эбийиэктэри тутуунан дьарыктанар.

Кини ордук сиһилии «Дьиэ кэргэн фермата» диэн бырайыак туһунан кэпсээтэ, бу  барыйыакка 10-20 сүөһү турар фермаларын тутуунан дьарыктаныахтара. Маны олоххо киллэриигэ «Туймаада-Лизинг» үүт ферматын толору комплегын атыылыыр.

Биир ферманы толору хааччыйарга  900 тыһ. солк курдук наада. Ити харчы 5 сыл болдьохтоох бэриллэр, маннайгы усунуос 10%. Тыа табаары оҥорооччулара ночоотторун сороҕун государство өйөбүлүнэн толуйуохтарын сөп. Ону таһынан хаһаайыстыбалар 6 мөл солкуобайдаах министерство граннарыгар киирсиэхтэрин сөп.

Мунньахха кыттыыны үүнээйи Департаменын начальнига Александр Поликарпов, «Туймаада» ФАПК генеральнай директорын солбуйааччы Алексей Захаров, Кэбээйи улууһун баһылыга  Игнат Спиридонов уонна улуус ТХУ-тын начальнига Айсен Татаринов ыллылар.