ХИФУ ЮНЕСКО кафедратын сэбиэдиссэйэ Анатолий Слепцов норуот депутаттарыгар Хотугу аҕыйах ахсааннаах төрүт олохтоох норуоттар испииһэктэрин туһунан сокуон барылын көрөллөрүгэр, ол бу омуктар түөлбэлээн олорор сирдэрин билиҥҥи курдук нэһилиэктэр таһымнарынан буолбакка, оройуон таһымыгар тиийэ кэҥэтиэххэ уонна студеннар бэйэлэрин салайынар систиэмэлэрин чэрчитинэн эбии пуун быһыытынан үөрэнэр тэрилтэлэргэ киллэрэргэ эттэ.

Маны таһынан Анатолий Слепцов Арктическай улуустартан сылдьар эдэр специалистары төрөөбүт оройуоннарыгар тардарга государственнай өйөбүл дьаһалларын ылынарга уолдьаста диэтэ. Олор истэригэр үс бастакы сыл үлэлииллэригэр эбии төлөбүр, дьиэ туттарга субсидия биэрии уонна төрөөбүт улуустарыгар барар-кэлэр ороскуоттарын сылга биирдэ буолбакка, сылга иккитэ төлөөһүн киириэхтээхтэр.

Иһитиннэрэр дакылааттары идэҕэ үөрэтии, кадрдары бэлэмнээһин уонна аттаран туруоруу министерствотын, СР-тын норуоттарын дьыалаларыгар Департамент,  республика үрдүк үөрэҕин кыһаларын бэрэстэбиитэллэрэ оҥордулар.

Төгүрүк остуолу парламент Хотугу аҕыйах ахсааннаах норуоттар боппуруостарыгар уонна Арктика дьыалаларыгар сис кэмитиэтэ тэрийдэ, ону кэмиттэт бэрэссэдээтэлэ, народнай депутата Елена Голомарева салайда.

ХИФУ-гар билигин күнүскү үөрэххэ 13 308 студент үөрэнэр, олортон 547 киһи – Аҕыйах ахсааннаах Хотугу төрүт олохтоох омуктар  (студеннар уопсай ахсааннарын 4,1%-на).