Былаан киин куорат олоҕун сүрүн хайысхаларын, тыын кыһалҕаларын хабар. Онно уопсастыбаннай объектары саҥардыы, өрөмүөннээһин, куорат уулуссаларын, дьон олорор кыбаарталларын, сынньанар сирдэрин тупсарыы, аһымал, социальнай, волонтерскай ааксыйалары ыытыы, үөрэхтээһини, култуураны, спорду сайыннарыыга, доруобуйа харыстабылыгар сыһыаннаах о.д.а. тэрээһиннэри ыытыы киирсэллэр.

Ол курдук, «Биһиги киин куораппыт» хайысхаҕа куоракка куттал суох буолуутун хааччыйар бырайыактар түмүллүбүттэр. Холобура, дьон олорор кыбаарталларын, элбэх кыбартыыралаах олорор дьиэлэр подъезтарын кэтээн көрүү (видеонаблюдение) систиэмэтинэн, уулуссалары лаампаларынан хааччыйыы, элбэх кыбартыыралаах олорор дьиэлэргэ старосталар үлэлииллэрин ситиһии киирсэллэр.

«Благоустройство», «Биһиги куораппыт бөһүөлэгэ», «Тус холобур» диэн олох-дьаһах хаачыстыбатын таһымын үрдэтэр аналлаах хайысхаларга олбуордары тупсарыы, бөх кутар дьааһыктары туруоруу, көҕөрдүү үлэтэ о.д.а. киирсиэхтэрэ. Холобура, биһиги куораппытыгар сибэккинэн дьарыктаналларын сөбүлүүр хаһаайка элбэх. Кинилэр куорат сорох уулуссаларын сибэккинэн бэйэлэрэ киэргэтиэхтэрин баҕаран, онно номнуо бэлэмнэнэн эрэллэр. Олоҕу-дьаһаҕы тупсарыы хайысхаларын чэрчитинэн «Норуот көҕүлээһинэ», «Мин ыра санаам тиэргэнэ», «Мин тапталлаах уулуссам», «Ыраас маҕаһыын», «Саамай ураты көстүүлээх күрүө» диэбит курдук интэриэһинэй, нэһилиэнньэ киэҥ араҥатын көҕүлүүр куонкурустар ыытыллыахтара.

Олох-дьаһах хаачыстыбатын тупсарыыга сыһыаннаах хайысхаҕа баһылык Айсен Николаев куорат ханаалын – Горканалы тупсарар туһунан көҕүлээһиннэри эбэн биэрэргэ ыйыы-кэрдии оҥордо. Ол курдук, бу боппуруос ааспыт сылга Уопсастыбаннай палаата дьүүлүгэр турбут норуот биир сүрүн көҕүлээһин этэ. Быйыл эмиэ бу боппуруос салҕаныахтаах, онон муус устар ыйга былааннанар уопсастыбаннай истиилэргэ куорат ханаалын сайыннарыыга этиилэргитин чөкөтөн аҕалыаххытын наада. Биллэрин курдук, быйыл ханаал ууну аһардар кыаҕын чөлүгэр түһэрии үлэтэ ыытыллыаҕа. Маны сэргэ эдэр архитектордар өттүлэриттэн киирбит сонун этии баар. Ол курдук, ханаалы нэһилиэнньэ сынньанар – рекреационнай зонатын тэрийэргэ туһаныахха сөп диэн санаа дьүүлгэ туруоҕа. Бүгүҥҥү күҥҥэ куорат дьаһалтата ханаал киин чааһын – Киров уулуссатыгар Бизнес-центр аттынан ааһар учаастагын тупсаран оҥорууга күрэх биллэрэн турар. Онон, ааҕааччылар, куорат ханаалын туһанан куораты киэргэтиигэ, тупсарыыга этиилээх буоллаххытына, муус устар 10 күнүгэр диэри сайаапкаҕытын оҥорон тиксэрэргэ тиэтэйиҥ. Кэлэр сылга аны ханаал архитектурнай бараанын бүүс-бүтүннүү бырайыактааһыҥҥа куонкурус биллэриллиэҕэ. Оттон бу бырайыагы сүрүннүүр тэрилтэнэн Уопсастыбаннай палаата буолар.
Биир сэргэх, элбэх киһи болҕомтотун тардар хайысханан «Айар дьоҕурдаахтар куораттара» хайысха буолар кэриҥнээх. Бу хайысха «Албан аат мүнүүтэтэ» куонкуруһа, управалар икки ардыларынааҕы култуурунай олимпиадата киин куорат талааннаах дьонун түһүлгэтэ буолар аналлаахтар. Биир интэриэһинэй көҕүлээһининэн Гиннесс рекордун олохтуур үгэһи салгыыр туһунан этии буолар. Ол курдук, саха норуотун биллиилээх бөлүһүөгэ, профессор Ксенофонт Уткин аны сайын Туймаада ыһыаҕар Үрүө Тунах кымыһы иһии алгыстаах сиэрин-туомун саамай маассабай, ол эбэтэр элбэх кыттааччылаах толорууга рекорду олохтуурга холонон көрүөххэ диэн сонун этиилээх.

Дьоһун сыһыаны, болҕомтону эрэйэр хайысханан «Өйдүүбүт. Киэн тутабыт. Махтанабыт» диэн Улуу Кыайыы 70 сылын көрсө ыытыллар көҕүлээһиннэр буолаллар. Бу хайысха чэрчитинэн Албан аат аллеята уонна Ийэ скверин иккис уочарата тутуллуохтара. Маны таһынан сэрии геройдарын ааттарын сүгэр, пааматынньыктара турар уулуссаларга, болуоссаттарга болҕомто ууруллуоҕа. «Ыраас өйдөбүнньүк» диэн сонун ааксыйа ыытыллан, куорат тумус туттар дьоно – политиктар, суруналыыстар, артыыстар – пааматынньыктары, болуоссаттары сууйуохтара.

Төһө киһи баар даҕаны, соччо санаа баар диэбиккэ дылы, норуот көҕүлээһинин сыла биир төгүрүк сылынан түмүктэммэтэ чуолкай. Ол да иһин Айсен Николаев киирэр этиилэри, көҕүлээһиннэри кэлэр сылларга тиийэ көрөр наадатын бэлиэтээтэ. «Норуот көҕүлээһиннэрин олоххо киллэрэ таарыйа биһиги инникини толкуйдуохпутун наада. Холобура, Улуу Кыайыы үбүлүөйүн тэрээһиннээхтик көрсөн, Саха АССР төрүттэммитэ 100 сылын бэлиэтиир бөдөҥ тэрээһиннэргэ акылаат уурабыт. Хаалбыт 8 сыл биир күн курдук биллибэккэ көтөн ааһыаҕа, онон билиҥҥиттэн бэлэмнэммэтэхпитинэ, өрөспүүбүлүкэбит 100 сыллаах үбүлүөйүн «дьуһуурунай» тэрээһиннээх көрсүбэтэрбит ханнык. Оттон 100 сыллаах бырааһынньыкпытын чыҥха уларыйан, тупсан, сайдан көрсүөхпүтүн баҕарар буоллахпытына, бүгүҥҥүттэн саҕалыахпытын наада», - диэтэ кини.

Өрөспүүбүлүкэ 100 сыллаах төрөөбүт күнүнэн тапталлаах куораппытыгар биир дьоһун бэлэҕинэн сынньалаө паарката буолуон сөп. Быйыл бу паарканы олохтуур сир учаастага быһаарылыннаҕына, аны күһүҥҥүттэн көҕөрдүү үлэтин саҕалыыр былаан баар. «Уонча сыл иһигэр ити паарканы куорат олохтоохторо уонна ыалдьыттара сөбүлээн сынньанар сирдэрэ оҥоруохтаахпыт», - диир Айсен Николаев. Сынньалаҥ пааркатын тэрийии биир сүрүн төрүөтүнэн куорат территориятын күөх үүнээйинэн хааччыйыы нуорматын ситэрэргэ холонуу буолар. Туох кистэлэ кэлиэй, атын куораттарга холоотоххо, биһиэхэ от-мас үүнүүтэ улахан сиэдэрэйэ суох.

Нэһилиэнньэттэн киирэр көҕүлээһиннэр муниципалитет өттүттэн араас хайысхалаах өйөбүлү ылыахтарын сөп. Ол курдук, харчынан, туттар тэрилинэн, техникэнэн, тэрээһин өттүнэн эбэтэр информационнай өйөбүлү. Бу күннэргэ ити өйөбүл бэрээдэгэ чопчулана сылдьар.

Эн куоракка тугу эрэ оҥоруоххун, оҥорторуоххун, оҥорорго көҕүлүөххүн баҕараҕын? Ханнык этиигин куорат дьаһалтата өйүөн баҕараҕын?
Оччоҕуна:
1. Олорор уокуругуҥ эбэтэр бөһүөлэгиҥ дьаһалтатыгар тиийэн, сайаапката биэр. Эбэтэр Ленин пр., 1, 307 каб., 42-46-78 төл. эрийэн билис.
2.​ Норуот көҕүлээһинин сылын тэрийэр хамыыһыйа нэһилиэнньэҕэ, олорор куораппытыгар ордук туһалаах бастыҥ этиилэри, бырайыактары быһаарарын кэтэс. Куонкурус түмүгүн киин куорат уокуруктааҕы салалтатын Якутск.рф официальнай сайтыгар «Год народной инициативы» түннүккэ кэтээ.
3.​ Эн этииҥ сөптөөҕүнэн ааҕылыннаҕына, муниципальнай өйөбүлү ылан, олоххо киирэр путевканы тутуоҕа.
4.​ Сайаапкалары биирдиилээн дьонтон уонна уопсастыбаннай тэрилтэлэртэн сыл устата ылаллар.