Хабырыыс Ондороос
Аҕа дойду Улуу сэриитин хонуутугар охтубут, Улуу Кыайыы туһугар толук буолбут саха ааттара биллибэт боотурдарын суон сурахтарыгар сүгүрүйэн туран...
- Үрүҥ күн – үрдүбэр,
- Үрүҥ хаар – тулабар...
- Кыһыл хаан – сарыал өһүүтэ,
- Кыһыл кыым – им сүтүүтэ!
- Өстөөхпөр өсөһөн
- Өлбөккө,
- Өлөрсөр
- Өһөхтөөх санаалаах сытабын...
- Истибэт буолбут
- Илиилэрбэр бирикээстээн
- Иитэбин бүлүмүөт диискэтин –
- Хара буор,
- Хаар,
- Хаан
- Хааһытыттан
- Хаһыытыы, хабырына,
- Халабырдьыттары кырыы
- Басыыстар
- Бастарын хатарыахтаах
- Илбистээх буулдьалары
- Итигэстиибин...
- Үрүҥ күнүм – хараарда,
- Үрүҥ хаарым – кытарда...
- Аан ийэ дайды
- Алгыстаах салгынын иҕэрийэрим
- Аны
- Аҕыйах сөкүүндэ хаалла!
- Олоҥхоһут эһэм
- Оҕо эрдэхпинэ сэһэргиир буолара:
- Илбис иҥмит боотура
- Иннин мээнэ биэрбэтэ –
- Тэллэҕин, сыттыгын, суорҕанын
- Тэрийдэҕинэ эрэ
- Бу орто дойдуттан
- Букатыннаахтык арахсара үһү...
- Ол аата мин эмиэ
- Одун Хаантан
- Оҥоһуулаах боотур буоллаҕым:
- Кэннибэр –
- Кэнсиэрбэ бааҥкатыгар кубулуйбут
- Тимир
- “Тиигир” сэмнэҕэ,
- Тулабар –
- Тураҥнаах буору уоппуттар –
- Эһэни күөйэн баран кыайбатах
- Эсэһит хара ыттары санатар
- Эсесовецтар,
- Иннибэр –
- Им-ньим барбыт,
- Иһиттэн өһөхтөөх буруо бургучуйар
- Иһийбит дзот...
- Халлаантан
- Хатаннык иһиирэ тохтор
- Эстэриик толоннор
- Эһэм олоҥхотун санаталлар,
- Ааһар былыты миинэн
- Атахха биллэрэр
- Абааһы уолун саната
- Арҕаа диэки көтөллөр
- Аһыҥалыы дырылыыр “юнкерстар” –
- Харахпар көстөр тиһэх
- Хартыыналарым...
- Ханнаҕыный
- Хаардаах кытылга
- Хаарыс былаатынан далбаатыы хаалбыт
- Харсар хара хаастааҕыам?!
- 09.05.2014
- Кыайыы күнэ.
Стиль и орфография автора сохранены.
Мнение автора может не совпадать с мнением редакции.
Мнение автора может не совпадать с мнением редакции.
Комментарии
Авторизация на сайте через социальные сети