ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт

Александр Контоев боруонса иһин тустуон сөп эбит

10 сентября 2015, 14:10
АХШ Лас-Вегас куоратыгар спортивнай тустууга аан дойду чемпионата үгэннээн ыытылла турар. Бүгүҥҥүттэн эр дьон көҥүл тустууга күрэхтэһиилэрэ 65 кг ыйааһынынан саҕаланар. Күн аҥарын инниттэн бу ыйааһыҥҥа сэрэбиэй быһыытынан ким-кими кытта киирсэрэ быһаарылынна. Билэргит курдук, биһиги бүгүҥҥү болҕомтобут барыта – Белоурссия чиэһин көмүскүүр Александр Контоевка ууруллар.

photoByWidth&id=43994&width=1000

Бу ыйааһыҥҥа барыта 47 бөҕөс ыйааһыннаныыны ааспыт. Киһи дьиктиргиирэ диэн арай, Азия оонньууларын кыайыылааҕа, Олимпиада призера индус Йогешвар Дутт тоҕо эрэ испииһэккэ суох. Уоннааҕы бу күҥҥэ күүстээхтэр бары бааллар диэххэ сөп.

Балаһыанньа быһыытынан үөһээҥҥи, бастакы бөлөххө - 16, алларааҥҥы бөлөххө - 31 кыттааччы киирбит. Онон кыттааччы ахсаанынан тэҥҥэ араарыы оҥоһуллубатах. Бу, үөһээҥҥи бөлөх кыттааччыларыгар барыстаах.

Аны туран сэрэбиэйгэ күүстээхтэри аттаран туруоруу хайдаҕын көрүөххэ. Үөһэ бөлөххө рейтинг быһыытынан аан дойду чемпиона Сослан Рамонов (Россия) уонна аан дойду чемпионатын призера Ганзориг Мандахнаран (Монголия) эрэ ойуччу тураллар. Оттон болгар Новачков, биһиги Контоевпыт, узбек Новрузов, японец Ишида кинилэртэн арыый намыһах кэрдиискэ тураллар дии саныыбын.

Ол кэмҥэ иккис бөлөххө Франк Чамизо, Магомедрасул Гаджиев (Польша), азербайджанец Тогрул Аскеров, армянин Дэвид Сафарян, американец Брент Мелткаф, иранец Саед Мохаммади курдук күүстээхтэр күөн көрсөр буолбуттар. Өссө киһи мээнэ ахсаантан бырахпат дьоно: аан дойду чемпионатын призердара Михаил Сава (Молдова), Франклин Гомес (Пуэрто-Рико), Европа оонньуутун призера Мустафа Кайа (Турция), Панамериканскай оонньуу призера Франклин Марен (Куба) бааллар.

Дьэ, онон туох да диэбиккит иһин, мин санаабар, иккис бөлөх састаап өттүнэн күүстээх буолбут.

Үгүс киһи Александр Контоев кими кытта тустарын интэриэһиргиир буолуохтаах. Уолбут бастаан швейцарец Графы кытта тустар. Кини кыайарыгар эрэл улахан. Салгыы күрэхтэһиигэ Новачков (Болгария) – Ким (Корея) кыайыылааҕын кытта тустар чинчилээх. Манна сэрэйдэххэ, болгарин хоторо буолуо. Новачков – Европа чемпионатын призера. Былырыын Европа чемпионатыгар олимпийскай призер Тогрул Аскеровы кыайан турар. Болгарин билигин АХШ-ка үөрэнэрэ, эрчиллэрэ биллэр. Онон дьиэтигэр-уотугар сылдьар курдук сананара биллэр. Өскөтүн Контоев болгарины ааһар түгэнигэр, финал чиэппэригэр Сослан Рамоновтыын тустуон сөп курдук көрөбүн. Эппитим курдук, бу бөлөххө финалга тахсар иһин тустууга Рамонов монголлуун көрсүөн сөп. Оччотугар Александр Контоев боруонса мэтээл иһин тустааччылар бөлөхтөрүгэр киириэн эмиэ сөп. Чэ, көбүөр көрдөрүө. Биһиги уолбутугар ситиһиини эрэ баҕарабыт.

Оттон иккис бөлөххө суруйбутум курдук, кытаанах киирсиилэр күүтүллэллэр. Мэтээлгэ киирсэргэ анаан оҥостон кэлбит Чамизолаах Гаджиев номнуо иккис эргииргэ көрсөллөр. Хайалара кыайарын эрдэ этэр уустук. Быһата бу бөлөххө финал аҥарыгар Чамизо/Гаджиев – Аскеров уонна Мелткаф – Букур (Румыния) паараларын кыайыылаахтара тахсыахтарын сөп курдук көрөбүн. Ол иннинэ Мелткаф иранец Мохаммадилыын киирсиитигэр ким кыайарын билгэлиир ыарахан...

Чэ, боротокуолу бастакы омос көрүүгэ итинник санаалар үөскээтилэр. Күрэхтэһии хаамыыта хайдах хайысхаланан иһэрин салгыы мантан аллараа баар “Комментарийга” суруйан иһиэм. Онон тустууну сэҥээрээччилэр бу блогу кэтээн көрө сылдьаргытыгар ыҥырабын.       

Просмотров: 1297 Комментариев: 7 Автор: Петр Павлов
Стиль и орфография автора сохранены.
Мнение автора может не совпадать с мнением редакции.

Комментарии Добавить комментарий

Петр Павлов 11 сентября 2015, 04:56 Ответить
0
Дьэ, иккилии эргиир кэнниттэн күүстээхтэр кимнээх буолаллара дьэҥкэрэн эрэр. Интернетинэн быһа биэриигэ түөрт көбүөрүнэн киирсиилэри барыларын тэҥҥэ көрдөрөр буоланнар, сорохторун эрэ көрөн хааллым. Бастакы көрүүгэ китаец Эрланбике олох үчүгэй өйдөбүлү хаалларда. Европа оонньууларын призера турок Кайаны 16:6 ахсаанынан эрэллээхтик кыайан баран олохтоохтор эрэллэрэ Мелткафы хото сыста. Бүтэһик сөкүүндэҕэ утарсааччытын атахтаан баран тобуктаппыта эбитэ буоллар, кыайара хаалла. Уолбут Александр утарсааччытын холкутук хотто. Хапсыһыыны өйдөөн-төйдөөн, туох да сыыс хамсаныыны оҥорбокко холкутук ыытта уонна очконан ыраас кыайыыны ситистэ. Онон сэрэйиллибитин курдук финал чиэппэригэр болгарин Новачковы кытта көрсүөҕэ. Дьэ манна күүс-уох, кыайыыга дьулуур, опыт быһаарара буолуо. Биһиги бэйэбит киһибитигэр ыалдьабыт. Ганзориг камерунеһы нэһиилэ кыайда (9:7), наһаа ыһыллаҕастык туһунна. Аллараа бөлөххө Чамизо, Аскеров, Мохаммади үчүгэй тустуулары көрдөрдүлэр. Онон финал чиэппэригэр көрсөр пааралар манныктар: Рамонов-Ишида, Новачков-Контоев, Новрузов-Джафарян, Энрикес-Ганзориг, оттон иккис бөлөххө Чамизо-Ким, Кенчадзе-Аскеров, Мелткаф-Мохаммади, Гарсиа-Букур.
Вы не можете оставить комментарий, пока не войдете в систему. Вход / Регистрация
Петр Павлов 11 сентября 2015, 06:10 Ответить
0
Эдэр эдэрэ өттө. Александр Контоев болгарин Борислав Новачковтыын киирсиитэ 5:0, болгарин туһатыгар буолла. Бастаан Контоев көҕө суох диэн, Новачковка биир баалы биэрдилэр. Онтон болгарин биһиги уолбут кэннигэр эриллэн тахсан икки очкону сурунна. Салгыы тустууга болгарин икки төгүл көбүөр таһыгар таһааран биирдии очколанна. Контоев иккитэ атахтаан көрдө да, табыллыбата. Утарсааччыта эриэн үөн курдук эриллэ сылдьар. Онон финал чиэппэригэр Рамонов-Новачков, Новрузов-Ганзориг, Чамизо-Аскеров, Мохаммади-Букур көрсөр буоллулар. Бары да абытай киирсиилэр. Хайалара кыайарын этэр уустуктардаах. Болгарин Рамоновы быйыл Турцияҕа, Догу турнирыгар кыайан турар. Оттон Чамизо Бакуга Европа оонньууларыгар Аскеровы обвивтаан түһэрэн баран, кылгас буолан аллараа буолан хаалбыта. Олох тэҥҥэ киирсибитэ диэхпин баҕарабын. Онон бу да сырыыга бырахсыылаах тустуу буолара буолуо. Оттон Мохаммади Букуру кыайарыгар эрэллээхпин. Чэ, көбүөр тугу көрдөрөрүн кэтэһиэххэ.
Вы не можете оставить комментарий, пока не войдете в систему. Вход / Регистрация
Петр Павлов 11 сентября 2015, 07:00 Ответить
0
Финал чиэппэригэр дьэ кытаанах киирсиилэр буоллулар. Монгол узбегы кытта тустуутун 4:1 ахсаантан саҕалаан көрдүм. Салгыы тустууга Новрузов атахха киирбитигэр Ганзориг обратнай курдук албаһы оҥорбута уонна бөҕөстөр туран кэлбиттэрэ. Онуоха судьуйа узбекка 4 баалы биэрбитигэр монголлар челлендж бырахтылар. Дьиҥэ манна монголга - икки, узбекка - биир баалы биэриэххэ сөп этэ. Оччоҕо ахсаан 5:3 Новрузов туһатыгар буолар. Ол гынан баран, судьуйалар өр быһаарсан баран, 11:1 ахсаанынан кыайыыны узбекка биэрдилэр. Ганзориг өйдөөмүнэ да хаалла. Бу балаһыанньаҕа мин санаабар сыыһа судьуйалааһын таҕыста. Записьтаабыт дьон ырытан көрөөрүн эрэ. Рамоновтаах Новачков тустуулара эмиэ мөккүөрдээх буолла. Хапсыһыы 4:17 сөк. бириэмэтигэр ахсаан 3:3 буолан турдаҕына болгарин атахтата сылдьан утары албастаан баран тиэрэ баттаппыт түгэнигэр судьуйалар быһаарыыларыгар болгардар сөбүлэспэккэ фишка бырахтылар. Ону судьуйалар өр соҕус көрөн баран, таблоҕа көрдөххө ахсааны 7:5, россиянин туһатыгар оҥордулар. Оттон сотору соҕус буолаат аны таблоҕа 9:5 диэн сурулунна. Бу түгэҥҥэ болгарин ыган тустан икки баалы ылбыта (9:7). Салгыы тустууга Новачков утары албаска түбэһэн икки баалы сүүйтэрэр (11:7). Оттон свистогы кытта тэҥҥэ икки очкону ылбытын аахпатылар. Онон судьуйалаһыҥҥа хайдах эрэ сыыһа ааҕыылар таҕыстылар диэхпин баҕарабын. Биир интэриэһинэй тустуунан Чамизо-Аскеров тустуулара буолла. Манна кубинец дьиэк биэрбэтэ, эрэллээхтик 10:5 ахсаанынан кыайан, Бакутааҕы хотторуутун боруостаата. Дьэ онон финал аҥарыгар Рамонов-Новрузов уонна Чамизо-Мохаммади көрсөр буоллулар.
Вы не можете оставить комментарий, пока не войдете в систему. Вход / Регистрация
Петр Павлов 11 сентября 2015, 07:40 Ответить
0
Дьэ, финалга тахсар иһин киирсиилэр соһуччу түмүктэри аҕаллылар. Маҥнай Чамизо Мохаммадилыын тустуутугар, иранец 2:0 хотон иһэн биир түгэҥҥэ Чамизо атахха киирбитин обратнайдаан баран, бэйэтэ хаалан хаалан, устунан уустук балаһыанньаҕа киирэн ыраастык хоттордо. Оттон Рамонов Новрузовы накаттаан иһэн бэйэтэ көлөттөн хаалан ыраастык барда. Ити кэмҥэ таблоҕа ахсаан 2:2 этэ, оттон бириэмэ 0:35. Онон аан дойду чемпионатын былырыыҥҥы финалистара иккиэн ыраастык хотторон, бу сырыыга боруонса эрэ иһин тустар кыахтаннылар. Аны сарсыарда 10:35 финалга узбек Ихтиор Новрузов уонна Италия кубинеһа Франк Маркес Чамизо тустууларын көрүөхпүт. Новрузов күүс-уох өттүнэн кыахтаах, улахан опыттаах тустуук. Утарсааччытын сыыһа туттуутун бырастыы гыммат. Оттон Чамизо кимтэн да толлубат, хорсун, сүрдээх имигэс тустуук. Хайалара кыайыай? Мин Чамизо кыайыа дии саныыбын.
Вы не можете оставить комментарий, пока не войдете в систему. Вход / Регистрация
Петр Павлов 11 сентября 2015, 07:49 Ответить
0
Арба, умна сыспыппын, бу ыйааһыҥҥа үһүс миэстэни ылар иһин киирсиэхтэрэ: үөһэ бөлөххө Африканер (Намибия) - Джафарян (Украина) кыайыылааҕа Ганзоригы (Монголия) кытта, салгыы ити хапсыһыы кыайыылааҕа Рамоновы (Россия) кытта тустуоҕа. Оттон аллараа бөлөххө Гаджиев (Польша) - Ким (КНДР) пааратын кыайыылааҕа Аскеровы (Азербайджан) кытта, салгыы ити хапсыһыы кыайыылааҕа Мохаммадины (Иран) кытта киирсиэҕэ.
Вы не можете оставить комментарий, пока не войдете в систему. Вход / Регистрация
Петр Васильев 11 сентября 2015, 10:28 Ответить
0
Кырдьык, олох соһуччу финал буолар буолла. Боруонса иһин Рамонов Мохаммадилыын көрсөр буоллулар дуо?
Петр Павлов 11 сентября 2015, 11:11 Ответить
0
Суох, Рамонов Мохамадилыын буолбатах. Боруонса иһин бастаан Рамонов-Ганзориг, онтон Аскеров-Мохаммади киирсиэхтэрэ. Аны чаас аҥаарынан буолара буолуо. Интернеккэ кэтээн көрөөрүҥ.
Вы не можете оставить комментарий, пока не войдете в систему. Вход / Регистрация
Вы не можете оставить комментарий, пока не войдете в систему. Вход / Регистрация
Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ